NATOga a’zo 15 mamlakat Afg‘onistonga qo‘shimcha harbiylarni yuborishi haqida e’lon qildi. Bu haqda NATO bosh kotibi Yens Stoltenberg alyans mudofaa vazirlarining yig‘ilishiga tashrifi chog‘ida so‘zladi. Uning ta’kidlashicha, ushbu kuchlar jangovar rolni bajarmaydi, deb xabar berdi “TASS”.
“Men NATO Afg‘onistondagi harbiy harakatlarini kuchaytirayotganini tasdiqlashim mumkin. 15 ta davlat qo‘shimcha kuch ajratishga rozi bo‘ldi va bugun ularning soni yanada ortishini kutmoqdaman. Gap jangovar vazifalarni bajarishga qaytish haqida emas, gap NATOning milliy kuchlarga yordam berishi va ularni tayyorlash missiyasini mustahkamlash haqida ketmoqda”, — dedi Stoltenberg.
Uning so‘zlariga ko‘ra, NATOning Afg‘onistondagi operatsiyalar bo‘yicha qo‘mondonligi umumiy miqdorda qo‘shimcha 4 ming nafar harbiy so‘ragan.
Buyuk Britaniya mudofaa vaziri Maykl Fellon o‘zining davlati qo‘shimcha 100 nafar askarni Afg‘onistonga jo‘natishini ma’lum qildi.
NATO Afg‘onistondan o‘z jangovar qo‘shinlarini olib chiqib ketishni 2014-yilda yakunlagan edi. Shundan beri mamlakatda “Qat’iy qo‘llab-quvvatlash” (Resolute support) missiyasi amalda bo‘lib, uning tarkibida 13,5 ming odam bor.
Izoh (0)