CNN: AQSh Suriyadagi aviabazaga zarba berish uchun kema va samolyotlarini jangovar marralarga joylashtirdi

AQSh Suriyadagi Shayrat aviabazasiga hujum uyushtirish uchun kema va samolyotlarini jangovar marralarda joylashtirdi, biroq hozircha zarba berishni rejalashtirmagan. Bu haqda CNN manbalariga tayanib, “TASS” xabar bermoqda.

Telekanalga ko‘ra, AQSh Suriyadagi aviabazani kun-u tun kuzatmoqda. Vashington u yerdan kimyoviy hujum amalga oshirilishi mumkin deb hisoblamoqda.

Oq uy bunga javob berishni va’da qilgan. Biroq aerodromda oxirgi paytlarda shubhali faollik kuzatilmagani bildirilmoqda.

CNN aniqlik kiritishicha, Oq uyning tahdidli bayonotlariga go‘yo Shayrat bazasiga kimyoviy moddalar bo‘lgan havo kemalari va konteynerlar keltirilgani haqidagi razvedka ma’lumotlari sabab bo‘lgan.

Eslatib o‘tamiz, AQSh shu yil aprel oyida mazkur aviabazaga raketa zarbalari bergandi.