Venesuelada politsiya vertolyoti Oliy sud binosiga hujum qildi

Venesuela politsiyasining ilmiy, jinoiy va kriminalistik tadqiqotlar korpusiga tegishli vertolyoti 27-iyun, seshanba kuni kechqurun Karakasni aylanib uchib, bo‘ysunmaslikka da’vat etdi va Venesuela Oliy sudi binosiga hujum qildi. Bu haqda aloqa va axborot vaziri Ernesto Vilyegas ma’lum qildi, deb yozadi “RIA Novosti”.

“Bir kishi respublikaga qarshi qurol ko‘tardi. U vertolyotni o‘g‘irlab ketib, oliy sudga hujum qildi”, — dedi u.

Ijtimoiy tarmoqlarga joylangan suratlarda ekipaj “350. Erkinlik” degan yozuvli plakatni osib olganini ko‘rish mumkin. Bunda gap konstitutsiyaning 350-moddasi haqida bormoqda, unda hukumat demokratik qadriyatlarni, tamoyillar va kafolatlarni, shuningdek, inson huquqlarini buzgan taqdirda, fuqarolar uni tan olmasligi mumkinligi haqida gapiriladi.

Axborotni prezident Nikolas Maduroning o‘zi ham tasdiqladi. Uning aytishicha, uchuvchilardan biri ilgari sobiq ichki ishlar vaziri Migel Rodriges Torresning uchuvchisi bo‘lgan. Maduroning ma’lumotlariga ko‘ra, vertolyotdan ikkita granata tashlangan, ulardan biri portlamay qolgan.

Uchuvchining taqdiri haqida xabar berilmayapti. Poytaxt ustidan uchib o‘tgach, u vertolyotni binolardan birining tomiga qo‘ndirgan.