Rossiya Federal xavfsizlik xizmati (FXX) Sankt-Peterburg metrosidagi terakt Telegram messenjeri yordamida tayyorlanganini ma’lum qildi. Bu haqda Meduza xabar bermoqda.

“Terrorchi-xudkush, uning sheriklari va xorijiy rahnamosi teraktni tashkillash va tayyorlashning barcha bosqichlarida Telegram messenjeridan foydalangani haqida ishonchli ma’lumotlar mavjud”, — deyiladi FXX press-relizida.

Rossiya maxsus xizmatiga ko‘ra, xalqaro terrorchilar o‘zaro va chet eldagi rahnamolari bilan maxfiy aloqalar uchun messenjerlardan keng foydalanadi. “Uzatilayotgan ma’lumotlarni yuqori darajada shifrlash uchun yashirin chatlardan foydalanish imkoniyati mavjud bo‘lgan” Telegram esa terrorchilar tomonidan ayniqsa faol qo‘llanadi.

Eslatib o‘tamiz, Sankt-Peterburg metrosida 3-aprel kuni yuz bergan portlash oqibatida 15 kishi halok bo‘ldi, 102 kishi jabrlandi. Mazkur ish yuzasidan 12 kishi hibsga olindi.