Parvoz qilgan aeroportiga qaytishga majbur bo‘lgan AirAsia uchuvchisi yo‘lovchilardan duo qilishlarini so‘radi

AirAsia aviakompaniyasining Perta (Avstraliya) — Kuala-Lumpur (Malayziya) yo‘nalishi bo‘ylab reysni amalga oshirayotgan va bortida 359 yo‘lovchi bo‘lgan samolyoti texnik muammolar tufayli parvoz qilgan aeroportiga qaytdi. Bu haqda Forum Daily xabar bermoqda.

Reys yo‘lovchilariga ko‘ra, ko‘kka ko‘tarilganidan 1,5 soat o‘tib Airbus A330-300 silkina boshlagan, biroz o‘tib esa qattiq ovoz eshitilgan.

Pertga qaytishga qaror qilinganidan so‘ng ikki soat davomida shunday holat kuzatilgan. Airbus A330-300 qo‘nishga chog‘lanayotganida yo‘lovchilarning aksari duo qilishga tutindi.

Ekipaj vaziyat haqida hech qanday ma’lumot bermagan, faqat “texnik sabablarga ko‘ra” Pertga qaytilishi bildirilgan, xolos. Yo‘lovchilarning aytishicha, uchuvchi ulardan ikki marta duo qilishlarini so‘ragan.

Hozirda Perta aeroporti xodimlari layner dvigatelidagi nosozliklar sababini aniqlamoqda.