Toshkentdagi “Versal” restoranida 23-iyun kuni shahardagi xususiy bolalar bog‘chalaridan biri bitiruv oqshomi uyushtirdi. Bu haqda “Sayyod.com” xabar bermoqda.
Xabar berishlaricha, bitiruv oqshomi “Karyera” o‘quv markazining “Karyera s kolibeli” nomli, 1—7 yoshli bolalar uchun mo‘ljallangan kursi bitiruvchilariga bag‘ishlangan.
Bitiruvning 15:00 dan 19:00 gacha davom etgan birinchi qismida 150 nafarga yaqin bolalar qatnashgan, 19:00 dan 23:00 ga qadar esa ularning onalari uchun tantanali oqshom uyushtirilgan.
“O‘quv markazining rahbari tarafidan qat’iy talab asosida onalar va bolalarning hammasi bir xil alohida libos tiktirishi va har bir bola limuzinda kelishi kerak bo‘lgan. Har bir boladan limuzinning o‘ziga 350 ming so‘mdan to‘plangan”, — deb yozadi “Sayyod.com”.
Ma’lumotlarga ko‘ra, “Karyera s kolibeli” bitiruvchilari uchun bunday tantanali tadbir birinchi marta uyushtirilayotgani yo‘q. Instagram tarmog‘ida 2016 yil iyulida bayramona kiyingan kurs bitiruvchilari limuzinda ketayotgani aks etgan video e’lon qilingan.
https://www.instagram.com/p/BHXCNSJgFo5/
Avvalroq Xalq ta’limi vazirligi maktab o‘quvchilari uchun bitiruv oqshomlarini xonadonlar, restoranlar va kafelarda o‘tkazishni qat’iyan taqiqlagani haqida xabar berilgan edi.
Izoh (0)