2017-yil 16-iyunda Surxondaryo viloyati Sho‘rchi tumani hokimi Xaybulla Mamatqulov egallab turgan lavozimidan ozod etildi. Bunga Xaybulla Mamatqulov O‘zbekiston Prezidenti tomonidan e’lon qilingan “Xalq bilan muloqot va inson manfaatlari yili”dan ko‘zlangan maqsad va vazifalarning tub mohiyatini yetarlicha tushunib yetmasdan, tuman aholisi bilan tizimli ravishda samarali aloqa o‘rnatmagani, fuqarolarning murojaatlarida ko‘tarilgan masalalarga e’tiborsizlik bilan qarab kelgani hamda bu borada hokimlik tizimida ishlarni lozim darajada tashkil eta olmagani sabab bo‘lgan. Bu haqda Facebook’dagi Xalq bilan muloqot sahifasi ma’lum qildi.
Xabar qilinishicha, sobiq hokim aholini qiynayotgan muammolarni chuqur o‘rganish va tahlil qilish asosida ularni hal etish yuzasidan amaliy chora-tadbirlar ko‘rish masalasida jiddiy kamchiliklarga yo‘l qo‘ygan. Bu borada unda talabchanlik yetishmasligi, sustkashlik qilib kelgani tufayli tuman faollari va aholisi orasida Xaybulla Mamatqulov faoliyatiga nisbatan e’tirozlar ortib borgan.
Surxondaryo viloyati hokimligi tomonidan Xaybulla Mamatqulovga yuqorida ko‘rsatib o‘tilgan jiddiy kamchiliklari uchun bir necha bor intizomiy choralar ko‘rilgan. Lekin u bundan tegishli xulosa chiqarmagan va hudud aholisi muammolarini hal etish yuzasidan zarur amaliy choralar ko‘rmagan.
Xaybulla Mamatqulov Sho‘rchi tumani hokimi sifatida 2012-yil 6-fevraldan ishlab kelayotgan edi.
Izoh (0)