Hamma eshitgan qiziq hangomadan boshlayman. Yo‘qolib qolgan bir kilogramm go‘shtni mushuk yeb qo‘ydi, deb iddao qilishdi. Shu mushukni taroziga tortishdi: roppa-rosa bir kilogramm. Mana endi savol: agar bu mushuk bo‘lsa, unda go‘sht qani? Agar bu go‘sht bo‘lsa, unda mushuk qani?
Ravshan Haydarov
Futbolga qiziqish bo‘lsa, bu kishini tanimasdan ilojingiz yo‘q. Chunki siz o‘yinini ko‘rishingiz mumkin bo‘lgan barcha jamoada ishlab chiqqan: “Paxtakor”, O‘zbekiston yoshlari, olimpiyachilari, milliychilari...
Haydarov ayni vaqtda O‘zbekiston U22 terma jamoasi bosh murabbiyi. “Paxtakor”dan 20 kun ichida iste’foga chiqdi va shu jamoani berishdi. Shu jamoaning murabbiyi bo‘lgan Jasur Abduraimovni esa “Paxtakor”ga berishdi — rotatsiya. Ravshan Haydarov milliy terma jamoada Samvel Babayanga yordamchi ekanidan kelib chiqsak, U22 uchun butun O‘zbekistonda boshqa murabbiy qurib qolganmi? Birinchi ishi ikkinchisiga halal bermaydi deguvchilar bo‘lsa, maqolani o‘qishda davom etamiz va…
…mushuk hikoyasiga qaytamiz. Agar Haydarov milliy bilan bo‘lsa, olimpiyachilar qani? Agar olimpiyachilar Xitoyda bo‘lsa, Haydarov qani?
Xitoy yig‘ini
O‘zbekiston U22 10—15-iyun kunlari Xitoy yig‘inida bo‘ldi. 13-sanada Xitoy U22 ga qarshi o‘rtoqlik o‘yinida maydonga tushdi va 2:3 hisobida mag‘lub bo‘ldi. O‘FF matbuot xizmati Haydarov jamoasining Xitoyga borishi haqida ancha oldin ma’lum qilgandi. Shundan keyin qaysi futbolchilar boradi, kim bilan boradi — indamadi. Xitoyda o‘yin bo‘lgani va hisob qanaqaligi haqida yozishi kerak bo‘lgani uchun yozdi. Biroq kim kim o‘ynadi, kim gol urdi — yozmadi. Gap esa mamlakatning ikkinchi raqamli jamoasi haqida bormoqda.
Bizga Ravshan Haydarov Tehronga milliy terma jamoa bilan uchib ketgani va o‘sha jamoa bilan Toshkentga qaytib kelgani ma’lum. Yuqorida Haydarovning O‘zbekiston U22 ga ustoz ekanini ham bilib oldik. O‘z-o‘zidan kelib chiqadiki, U22 Xitoyga boshqa murabbiy bilan yo‘l olgan. Aytaylik, Aleksandr Mochinov bilan (u aslida U19 bosh murabbiyi).
Yana o‘sha savol: madomiki Haydarovning muhimroq yumushlari bor ekan, O‘zbekistonda undan boshqa murabbiy yo‘qmidi? Yoki Haydarovsiz ishlay olishiga ishonmasa, Babayanga termada nima bor? Uning yonida Viktor Jalilov, Grigoriy Kolosovskiy, Deyan Jurjevich kabi yordamchilari bo‘lsa, shu to‘rt kishining yoniga beshinchisi nega kerak, agar darvozaga 180 daqiqa davomida 1 ta ham aniq zarba bera olmaydigan ahvolda bo‘lsak?
Terma jamoalar markazi
Yopildi shu tashkilot. Nega yopildi, kimga halal berdi bizga qorong‘u. Shundan kelib chiqib, Ravshan Haydarovni O‘zbekiston U22 ga kim bosh murabbiy qilgani ham jumboq. Samvel Babayan milliy terma tepasiga kelgach, Asqar Tolibjonov boshchilik qiladigan Terma jamoalar markazidan o‘z jamoasini ajratib olgan bo‘lib, qolgan barcha termalar markaz zimmasida edi.
Mushuk hikoyasiga qaytamiz. Agar Markaz yo‘q bo‘lsa, Tolibjonov qani? Agar Tolibjonov shu yerda bo‘lsa, unda “Paxtakor”ga ishga kirish uchun kim ariza yozdi? Agar Tolibjonov “Paxtakor”da ishlamoqchi bo‘lsa, Haydarovni U22 ga kim murabbiy qildi?
Ravshan Haydarov O‘zbekiston U19 termasi bilan 2015-yil yoshlar mundialining chorak finaliga qadar yetib borgandi. Osiyo chempionatida KXDR termasidan 0:5 hisobida yengilib, yarim finalda to‘xtagan. Vaholanki jamoani Sergey Lushchan shakllantirgan, shunchaki unga “Bunyodkor” bosh murabbiyligi taklif etilgani uchun, termadan voz kechgan. Hozir esa yer bir marta aylanib keldi, Lushchan klubidan iste’foga chiqarildi. Bu unga termadagi faoliyatini davom ettirish imkonini berishi mumkinmi? Axir, O‘zbekiston U22 termasining asosiy futbolchilari uning tarbiyalanuvchilari hisoblanadi. Mumkin, biroq “Paxtakor” boshqa formula, “Bunyodkor” boshqa. Tolibjonovga “Bunyodkor” emas, o‘zi xizmat qilib o‘rgangani “Paxtakor” kerak.
Xitoy safari kerakmi?
Ravshan Haydarovning U22 jamoasi 28-may kuni Olmaliq shahrida Rossiyaga qarshi o‘rtoqlik o‘yinida maydonga tushdi. O‘zbekistonga Yevropada nom qozongan jamoaning tashrif buyurgani yaxshi. Uchrashuvni stadionda anchagina odam ko‘rdi, “Sport” kanali translyatsiya qildi. Tashkilotchilik va g‘oya borasida gap so‘z bo‘lishi mumkin emas.
Biroq Xitoyga safar varianti shuning g‘irt aksi bo‘ldi:
- Birinchidan, O‘zbekiston U22 Xitoyga bosh murabbiysiz bordi;
- Ikkinchidan, ular qaytguncha O‘zbektiston chempionatida tur boshlandi;
- Uchinchidan, termaga futbolchilarini bergan klublar aziyat chekdi.
FIFA kunlari sabab milliy chempionatlarda ikki haftalik tanaffus yuzaga keldi. Bundan unumli foydalangan Braziliyadan tortib, Argentinaga qadar o‘rtoqlik o‘yinlari, shu orqali pul ishlash payida bo‘ldi. Osiyo va Yevropa mamlakatlari bittadan o‘rtoqlik va rasmiy o‘yinlarda maydonga tushishga ulgurdi. Mana endi savol, U22 terma jamoasi shu ikki hafta ichida Xitoyga borib, o‘yinini o‘tkazib kelsa bo‘lmasmidi? Bo‘lardi, bunda hech qanday muammo yo‘q. Evaziga Haydarov shogirdlari bilan bo‘lardi, futbolchilar esa klubi ixtiyoriga o‘z vaqtida yetib kelardi.
14—15-iyun kunlari O‘zbekistonda tur boshlansa-yu, 15-iyun kuni Toshkentga uchib kelgan futbolchilar qanday qilib klubi safida maydonga tusha oladi?
- Birinchidan, futbolchilar kamida bir hafta davomida jamoadoshlari bilan mashg‘ulot o‘tkazmagan;
- Ikkinchidan, klub murabbiylari bo‘lajak o‘yinga ishlab chiqqan taktikadan bexabar;
- Uchinchidan, safardan uchib kelgan futbolchi 24 soatdayoq tiklana olmaydi. Gap mamlakatlari bir-biriga yaqin bo‘lgan va har ikki soatda o‘zaro reyslari bor Yevropa haqida emas, Osiyo haqida bormoqda.
Va eng asosiysi, 15—19-iyul kunlari bo‘lib o‘tadigan saralashda ishtirok etadigan O‘zbekiston U22 termasini bor-yo‘g‘i 2018-yilgi Osiyo chempionati kutib turibdi. Reglamentga ko‘ra, har ikki yilda o‘tadigan qit’a chempionati to‘rt yilda bir marta Olimpiadaga yo‘llanma beradi. Ya’ni, O‘FF uzoqroqni ko‘rib, Tokio—2020 Olimpiadasi uchun tayyorgarlik ko‘rishi yanada mantiqliroq bo‘lardi. Biz esa eski xatoni takrorlashni boshladik. Xato qilish ayb emas, uni takrorlash ayb degan ekan qaysidir odam.
Chunki, Ravshan Haydarov U22 ga yig‘ib olgan futbolchilar Tokio Olimpiadasida 23 yoshdan katta bo‘lib qolgani uchun ishtirok eta olmaydi. Tokioda 1997—2000-yilda tug‘ilgan futbolchilar O‘zbekiston sharafini himoya qilishi mumkin (agar yo‘llanmani qo‘lga kirita olsak, Rio—2016 yo‘llanmasini Samvel Babayan degan murabbiy yuta olmagan, hozir o‘sha tajribasini milliy termaga ulashmoqda). Shundan kelib chiqib, asosiy e’tibor 2018-yilgi quruq chempionatga emas, 2020-yilgi Olimpiadaga qaratilishi maqsadga muvofiq (IMHO).
Tokio—2020
1997—2000-yilda tug‘ilgan futbolchilar sizga ancha yosh ko‘rinsa, shu yil Yevropa ligasining finaliga qadar yetib kelgan Gollandiyaning “Ayaks” klubiga nazar soling. 1995—1998-yilda tug‘ilgan futbolchilar butun Yevropani o‘ziga qarata oldi. Ular ishni 2017-yilda boshlamagan, bu muvaffaqiyatga 7—8 yillik mehnati evaziga yetib kelgan.
O‘zbekiston futboli ham Gollandiya, Germaniya, Belgiya kabi futboli taraqqiy etayotgan mamlakat yo‘lini chuqur o‘rganishi, tahlil qilishi uchun hech narsa halal bermaydi. Bunda O‘zbekistonning hamma yosh terma jamoasida ishlab chiqqan Ravshan Haydarov kabi murabbiylar bilan katta muvaffaqiyatlarga erishish qiyin. 10—15 yillar davomida futbol muxlislari uning imkoniyatlari va potensiali haqida bilib ulgurdi. O‘FF esa uni terma jamoalarga jalb qilishdan charchayotgani yo‘q.
Ravshan Haydarov milliy termada Babayanga yordamchi bo‘lsa, Babayan milliydan ishdan ketib qolsa, Haydarovga yordamchi bo‘ladimi? Milliyni shunda Viktor Jalilovga berish kerakmi? Terma jamoalar markaziga “Paxtakor”dan kelgan Asqar Tolibjonov yana “Paxtakor”ga qaytsa va yuqoridagi kabi rotatsiyalar bo‘lsa, futbol o‘z o‘qi atrofida aylanib qolayotgani oddiq bir mantiq, shunday emasmi? Bunda murabbiylar va mutaxassislar o‘zgarayotgani bilan, odamlar o‘zgarmayapti. O‘z qozig‘imiz atrofida aylanishimiz shu menimcha.
Mushuk hikoyasiga qaytamiz. Agar futbolimizda hamma narsa joyida bo‘lsa, unda katta g‘alabalar qani? Agar erishganlarimiz katta g‘alabalar bo‘lsa (o‘smirlar va yoshlar futbolida), unda Yevropada o‘z o‘rnini topib ketgan futbolchilar qani?
Izoh (0)