Ostonada bo‘lib o‘tayotgan EXPO 2017 ko‘rgazmasi doirasida O‘zbekiston pavilyonida namoyish etilgan videorolikda aytilishicha, O‘zbekistonda yiliga 320 quyoshli kun bo‘lib, bu mamlakatning sof energiyasi sohasidagi salohiyatini yaqqol namoyish etadi, deb xabar beradi UzNews.
Jumladan, mamlakatning quyosh energiyasi salohiyati yiliga 51 milliard tonna neft ekvivalentiga, shamol energiyasi salohiyati yiliga 360 million tonna neft ekvivalentiga, gidroenergiya salohiyati 1,8 million tonna neft ekvivalentiga teng.
Sof energiya olish uchun 11 million gektardan ortiq yerdan foydalanish mumkin.
2030-yilga kelib energiyaning eng katta ulushini derazali quyosh panellaridan olish rejalashtirilmoqda.
O‘zbekistonda yiliga 200 ming avtomobil ishlab chiqariladi. 2030-yilga kelib ularning 48,5 foizi muqobil yoqilg‘i turlari bilan ta’minlanadi.
Quyosh va shamol energiyasi manbalarining ko‘payishi bilan mintaqalarda O‘zbekiston iqtisodiyoti 30 foizga o‘sadi.
Sof energiya mamlakatning asosiy ustuvor rivojlanish yo‘nalishlaridan biri bo‘lib qoladi. Bu yoqilg‘i sarfini 50 foizga kamaytiradi, havo ifloslanishini 80 foizga kamaytiradi.