Germaniyaning Transfermarkt.de sayti O‘zbekiston milliy terma jamoasi futbolchilarining yangi transfer baholarini e’lon qildi, deb yozdi “Erudit Sport” nashri. Unda bosh jamoaning bir qator futbolchilari o‘z narxini ko‘tarib olganini, yana aksarida pasayish kuzatilganini ko‘rish mumkin.
Quyida transfer bahosi ko‘tarilgan futbolchilar haqida ma’lumot beriladi.Sardor Rashidov
Klubi: “Al-Jaish” (Qatar)2016-yil —1,3 million yevro2017-yil —2 million yevroQimmatlashdi — 700 ming yevro
So‘nggi bir yil davomida transfer bahosi eng katta o‘sishga erishgan o‘zbekistonlik futbolchi Sardor Rashidov bo‘ldi. 26 yoshli hujumkor yarimhimoyachi o‘tgan yili O‘zbekiston terma jamoasida ham, klubi “Al-Jaish”da ham yomon taassurot qoldirmadi. Qatarliklar safida to‘purarlar qatoridan joy olib, Osiyo Chempionlar Ligasi yarim finaliga qadar bora oldi. O‘yin borasida ham, transfer narxi borasida ham hali yana o‘sishi kutilayotgan Rashidov bugungi kunga kelib Vitaliy Denisov va Odil Ahmedovdan keyingi O‘zbekistonning eng qimmatbaho uchinchi futbolchisi bo‘lib turibdi.Temurxo‘ja Abduxoliqov
Klubi: “As-Sayliya” (Qatar)2016-yil — 600 ming yevro2017-yil — 1 million yevroQimmatlashdi — 400 ming yevro
O‘tgan mavsum O‘zbekiston chempioni va kubogi sohibiga aylangan Temurxo‘ja Abduxoliqov “Lokomotiv”dan Qatarning “As-Sayliya” klubiga o‘tib adashmadi. Oliy Liga to‘purari sifatida tahlilchilar tomonidan 600 ming yevro deya baholangan 26 yoshli hujumchi, Qatar Super ligasidagi faoliyatini ham gollar urish bilan boshlab, o‘zini ko‘rsata oldi. Legionerga aylangach, milliy terma jamoadan ham taklif olayotgan Temurxo‘janing bugungi transfer bahosi 1 million yevro. Termadagi raqobatchisi Igor Sergeyev 400 ming yevroga arzonlashgan bir paytda, Abduxoliqovning transfer narxi shunchaga qimmatlashgan.Aleksandr Lobanov
Klubi: “Paxtakor”2016-yil — 300 ming yevro2017-yil — 600 ming yevroQimmatlashdi — 300 ming yevro
Samvel Babayan tomonidan bugungi kunda O‘zbekiston milliy terma jamoasining birinchi raqamli posboniga aylantirilgan Aleksandr Lobanov Erondagi muvaffaqiyatsiz mavsumidan keyin transfer bahosini ko‘tarishga erishdi. O‘tgan yili 300 ming yevroga baholangan Lobanovning transfer qiymati bir yil ichida yana 300 ming yevrogacha “tosh bosa oldi” va 600 ming yevroga aylandi. Darvozabonning transfer bahosi oshishiga “Paxtakor”dagi o‘yinlari emas, asosan milliy terma jamoa darvozasini muntazam qo‘riqlayotgani sababligi sir emas.Eldor Shomurodov
Klubi: “Bunyodkor”2016-yil — 300 ming yevro2017-yil — 600 ming yevroQimmatlashdi — 300 ming yevro
Yosh futbolchilar orasidan bu boradagi eng yaxshi ko‘rsatkich Eldor Shomurodovga tegishli bo‘ldi. O‘tgan mavsumda www.transfermarkt.de sayti tomonidan 300 ming yevroga baholangan 21 yoshli “Bunyodkor” futbolchisi klubi safida Oliy Liga va OChL bahslarida, milliy terma jamoamiz safida esa JCh-2018 saralash bahslarida maydonga tushib, mutaxassislar e’tiborida bo‘ldi. Muhim pallalarda Shomurodovning ishonchni oqlagani uning transfer bahosiga ijobiy ta’sir etgan va Eldornnig transfer narxi 300 ming yevroga oshib, hozirda 600 ming yevroni tashkil etmoqda.Jaloliddin Masharipov
Klubi: “Lokomotiv”2016-yil — 250 ming yevro2017-yil — 450 ming yevroQimmatlashdi — 200 ming yevro
Tobora Oliy liganing eng yaxshi futbolchilaridan biri sifatida O‘zbekiston termasidan ham chaqiruv olayotgan Jaloliddin Masharipovning o‘yini bilan parallel ravishda transfer bahosi ham o‘smoqda. O‘tgan mavsumda 250 ming yevroga baholangan 23 yoshli futbolchining ijara asosida “Lokomotiv” safida OChL o‘yinlarida o‘zini ko‘rsatishi uning qiymatini yana 200 ming yevroga oshirdi va ajoyib texnikaga ega yarim himoyachining transfer qiymati bugungi kunda 450 ming yevroni tashkil etmoqda.Marat Bikmayev
Klubi: “Lokomotiv”2016-yil — 450 ming yevro2017-yil — 600 ming yevroQimmatlashdi — 150 ming yevro
2000-yillar boshida “Paxtakor” safida porlab chiqqan Marat Bikmayev hozirda faoliyatidagi “ikkinchi yoshligi”ni o‘tkazmoqda. 31 yoshli hujumchi o‘tgan mavsumda “temiryo‘lchilar”ga ikkita sovrinni qo‘lga kiritishda yordam bergan bo‘lsa, bu yil Oliy liganing eng yaxshi to‘purari sifatida jamoasini chempionlik sari dadil boshlamoqda. Odatda futbolchilarning transfer bahosi 30 yoshdan keyin “sho‘ng‘ish”ni boshlasa-da, Bikmayevda buning aksi kuzatilmoqda. Marat 31 yoshida faoliyatidagi eng yaxshi sermahsullikni ko‘rsatib, “Lokomotiv”ning eng yaxshi to‘purari bo‘lish bilan birga, terma jamoaning Xitoy va Janubiy Koreyaga qarshi o‘yinlarida gol ham urdi. Bunday natijalar uning transfer bahosi oshishini — 450 mingdan 600 ming yevrogacha ko‘tarilishini ta’minladi.
Izoh (0)