Yevrokuboklarning 2018/19-yilgi mavsumlari finallari uchun da’vogar bo‘lgan stadionlar nomi e’lon qilindi. Ular orasida Ozarbayjonning Boku va Qozog‘istonning Astana shaharlarida joylashgan stadionlar ham bor.
“Sports.ru” ma’lumotiga ko‘ra, Chempionlar ligasining final uchrashuvini o‘zida qabul qilish uchun ikki da’vogar bor: Madridda “Atletiko” uchun yangi qurilgan “Metropolitano” arenasi hamda Bokudagi “Olimpiya” stadioni.Ozarbayjonliklar, shuningdek, Yevropa ligasining final uchrashuvini qabul qilish uchun ham da’vogar hisoblanadi. Ulardan tashqari “Sevilya”ning uy stadioni hisoblangan “Ramon Sanches Pisxuan” hamda Turkiyadagi “Beshiktosh Arena” o‘yingohi Yevropa ligasining hal qiluvchi o‘yini uchun raqobatda bo‘ladi.Yevropa Superkubogi o‘yinini o‘zida qabul qilishni istaydigan da’vogar shaharlar soni 7 tani tashkil qildi: Albaniyaning Tirana, Fransiyaning Tuluza, Isroilning Xayfa, Qozog‘istonning Astana, Shimoliy Irlandiyaning Belfast, Polshaning Gdansk hamda Turkiyaning Istanbul shaharlari.
Qozog‘istonning “Astana Arena” stadioni bundan tashqari Chempionlar ligasining ayollar o‘rtasidagi musobaqasi finali mezbonligi uchun Vengriyaning Budapesht shahrida joylashgan “Ferentsvarosh Arena” bilan raqobatda bo‘ladi.