Xumayniy maqbarasiga hujum uyushtirgan shaxs o‘z joniga qasd qildi

Tehron shahri yaqinida joylashgan Xumayniy maqbarasiga hujum qilgan shaxslardan biri kaliy sianid ichib o‘z joniga qasd qildi. Bu haqda Eron telekanali Press TV’ga tayanib, Meduza xabar berdi.

Avvalroq, Eron OAVlari maqbaraga hujum uyushtirgan shaxslardan biri portlovchi qurilmani ishga tushurib yuborgani haqida xabar berilgan edi. “Mehr” agentligining ma’lumotlariga ko‘ra, maqbaraning g‘arbiy hovlisidagi portlashni shu xudkush amalga oshirgan.

Eron OAVning xabar berishicha, maqbaraga hujumni uch nafar shaxs amalga oshirgan. Hujum uyushtirganlarning biri o‘zini portlatib yuborgan, norasmiy manbalarga ko‘ra yana biri politsiya tomonidan otib o‘ldirilgan. “Mehr”ning xabariga ko‘ra esa ularning yana birini politsiya qurshab olgan.

Rasman tasqidlanmagan ma’lumotlarga qaraganda, maqbaraga uyushtirilgan hujum oqibatida besh kishi jarohat olgan.

Tehronda sodir bo‘lgan teraktlar bo‘yicha mas’uliyatni IShID terrorchilik tashkiloti o‘z zimmasiga oldi.