Novosibirsk shahrining Leninsk tumanida 2 yoshli bolakay 7-qavatdan qulab, omon qoldi. Bu haqda Rossiya Tergov qo‘mitasining Novosibirsk viloyati bo‘yicha boshqarmasi matbuot xizmati ma’lum qildi, deya xabar beradi “TASS”.
“2 yoshli o‘g‘il bolaning 3-iyun kuni Novosibirsk shahri, Kotovskiy ko‘chasidagi 41-uyning 7-qavatidagi kvartira derazasidan qulashi bo‘yicha tekshiruv olib borilmoqda. Tekshiruv davomida yuz bergan hodisaning barcha tafsilotlari aniqlanadi va uning natijalaridan kelib chiqib, protsessual qaror qabul qilinadi”, — xabar berdi matbuot xizmati.
Tergov ma’lumotlariga ko‘ra, bolakayning onasi uxlab qolgan payt u deraza tokchasiga chiqib, ochiq derazaning chivinga qarshi to‘riga tirmashadi. To‘r bolaning og‘irligini ko‘tara olmadi va u 7-qavatdan pastga quladi.
Hodisa joyiga yetib kelgan tez tibbiy yordam xodimlari uni kasalxonaga olib ketdi. Bolada qayd etilgan shikastlanishlar hayot uchun xavfli emasligi bildirilmoqda.