XKSning ikki a’zosini olib kelayotgan tushuvchi apparat Qozog‘istonda qo‘ndi

Xalqaro kosmik stansiyaning ikki a’zosini olib kelayotgan “Soyuz MS-03” kosmik kemasining tushuvchi apparati Qozog‘istonda qo‘ndi. Bu haqda, parvozlarni boshqarish markaziga tayanib, “TASS” xabar bermoqda.

Yerga rossiyalik kosmonavt Oleg Novitskiy va yevropalik astronavt Toma Peske qaytdi. Ular orbitaga 2016-yil 17 noyabrida chiqqan edi. Ularning orbitada bo‘lish davomiyligi 197 sutkani tashkil qildi.

XKSda rossiyalik kosmonavt Fyodor Yurchixin, shuningdek, amerikalik astronavtlar Jek Fisher va Peggi Uitson qoldi. Uitson XKSga Novitskiy va Peske bilan birga kelgan edi, ammo shu yil bahoridan Rossiya ekipajining qisqarishi va “Soyuz MS-04” kemasida bo‘sh joy paydo bo‘lishi munosabati bilan uning ekspeditsiyasi sentabrga qadar uzaytirildi.