Germaniyada musiqiy festival terakt xavfi sabab to‘xtatildi

Germaniyada mashhur Rock am Ring festivali terakt xavfi sabab to‘xtatildi. Bu haqda musiqiy bayram tashkilotchilari ma’lum qildi, deb xabar berdi “TASS”.

Germaniya politsiyasi vaziyat bilan tanishib chiqqach, tomoshabinlar festival o‘tkazilayotgan hududni tark etishi haqida buyruq berdi.

87 ming nafardan ortiq odam uch kunlik bayramga chiptalar sotib olgan edi. To‘rtta sahnada umumiy 85 ta musiqiy jamoa, jumladan, die Toten Hosen, Rammastein, System Of A Down kabi taniqli guruhlar chiqish qilishi kerak bo‘lgan.

Keyinroq, Germaniya huquq-tartibot organlari vakillari Rock am Ring festivaliga xizmat ko‘rsatuvchi firmaning ikki nafar vakilini qo‘lga oldi. Ular festival hududiga shubhali buyum olib kirgan, deya xabar qildi Welt nashri.