O‘zbekiston Prezidenti Shavkat Mirziyoyev Andijon viloyatining Bo‘z tumani “Chorvador” mahalla fuqarolar yig‘ini hududida qurilgan arzon uy-joylarni borib ko‘rdi, deya xabar bermoqda O‘zA.
“Prezident Akmal va Zilolaxon Rahmonovlar xonadonida bo‘lib, bu yerda yaratilgan sharoitlar, oilaning turmushi, farzandlar tarbiyasi bilan qiziqdi”, — deyiladi agentlik xabarida.
Ushbu mahallada maydoni 2 sotixli, uch xonali 10 zamonaviy uy bunyod etilgan. Ularda yotoqxona, mehmonxona, oshxona, xo‘jalik binolari mavjud. Uylar tabiiy gaz, toza ichimlik suvi va elektr energiyasi bilan ta’minlangan.
“Shavkat Mirziyoyev bunday turar joylarni ko‘proq qurib, odamlarga munosib sharoitlar yaratish doimo e’tiborda bo‘lmog‘i zarurligini ta’kidladi. Mutasaddilarga uy-joylarni aholi va zamon talablari asosida loyihalashtirish va bunyod etish yuzasidan tavsiyalar berdi”, — deb yozadi O‘zA.
Ma’lumot uchun, O‘zbekiston Prezidentining 2016-yil 21-oktabrdagi “2017-2021 yillarda qishloq joylarda yangilangan namunaviy loyihalar bo‘yicha arzon uy-joylar qurish dasturi to‘g‘risida”gi qaroriga muvofiq barcha joylarda arzon uylar qurilishi davom etmoqda.
Izoh (0)