Usmonovning jamoasi memlar va parodiyalar tanlovi ishtirokchilarining ilk ishlarini e’lon qildi

Biznesmen Alisher Usmonovning jamoasi “VKontakte”dagi maxsus guruhga memlar va parodiyalar ishtirokchilarining ilk ishlarini joyladi, deb yozadi Afisha Daily.

Birinchi tanlov ishida ko‘z bog‘ichi ishga solindi, uni siyosatchi Aleksey Navalniy o‘ziga “zelyonka” bilan hujumdan so‘ng, ko‘zi kuyishi natijasida taqishga majbur bo‘lgan edi.

Ikkinchi ishda Navalniy ishtirok etishni rejalashtirgan 2018-yilgi prezident saylovlari haqida aytiladi. Rolik shunday jumlalar bilan yakunlanadi: “Sen prezident bo‘lmaysan. Men tirik ekanman, aniq hech qachon”.

Bundan tashqari, Usmanov Challenge (tanlov nomi) tashkilotchilari alohida postda tanlov g‘oliblarini saralab olish mexanikasi haqida gapirib berdi.

“Har hafta oxirida bitta g‘olibni Alisher Burxonovichning shaxsan o‘zi tanlab oladi, ikkinchisini tanlash esa sizga havola etiladi — postga qo‘yilgan har bitta layk bitta ovoz, har bir repost esa — beshta ovoz sifatida qabul qilinadi”, — deyiladi xabarda.

Tanlovni qo‘llab-quvvatlash jamoasi, shuningdek, mukofot jamg‘armasi ikki marta oshirilganini ma’lum qildi.

Avvalroq Alisher Usmonovning u haqdagi eng yaxshi roliklar mualliflariga mukofot berishi to‘g‘risidagi gaplaridan so‘ng, internet foydalanuvchilari ommaviy tarzda uni memlashtirishni boshlagan edi.