Avvalroq, xonanda Shahnoza Otaboyevaning litsenziyasi tugatilgani haqida ma’lum qilingandi. Jurnalist Feruz Muhammad xonanda bilan bog‘lanib, bo‘lgan voqeaga oydinlik kiritdi.
Mazkur to‘y Surxondaryo viloyatida bo‘lishi kerak edi, to‘y xizmati esa bir oy avvaldan olib qo‘yilgandi. Davlat tadbiri borligini to‘ychilarga aytganimda, ular Jizzaxga, safarda turar-joyimiz bo‘lgan “Diplomat” mehmonxonasining tagiga kelib olishdi. “Xalq sizni ko‘raman deb niyat qilgan, ertaga olib kelish qo‘lingdan kelmabdi degan gapni ko‘tara olmaymiz, bizni sharmanda qilmang, kerak bo‘lsa portalga ham yozamiz, agar bormasangiz o‘zimni osaman”, deb mehmonxonamni oldida turib olishdi.“O‘zbeknavo”dagi Odil akaga “akajon, mayli men tadbirda qolishim uchun, biror variant qilib, o‘rnimga mashhurroq san’atkorni yuboraylik”, deb iltimos qildim. Odil aka “100 % garantiya beraman Shahnoza bormaydi”, deb turib oldilar.Bo‘lmasa “O‘zbeknavo”dagilarga bo‘layotgan vaziyat haqida uch kun oldin xabar berganman, barcha repititsiyalarga qatnashganman. 23-may kuni tadbirdan olib tashlashganida, to‘y egalariga telefon qilib, “bo‘ldi, siqilmanglar, tadbirdan olib tashlashdi, boraman”, dedim. Ular “niyatimiz xolis ekan”, deb xursand bo‘lishdi.
24-may kuni “Jannatmakon O‘zbekiston” deb nomlangan qo‘shig‘imni olib tashlab, “Vodiylarni yayov kezganda” deb nomlangan qo‘shig‘imni tadbirga qo‘shishdi. Bunday vaziyatda qanday qilib, to‘y egalariga “yana bora olmaymandigan bo‘lib qoldim” deyman.Ikki o‘t orasida qolib ketdim, na“ O‘zbeknavo”, na to‘y egalari ahvolimni tushunishdi.
To‘yga pul uchun bormadim, hech qachon tug‘ilib o‘sgan yurtimning, ya’ni Surxondaryo viloyatining to‘ylarida “mana buncha pul berasanlar” demaganman.Ko‘p pul ham olmagandim, pul uchun tadbirni tashlab ketmadim. U yerda qarindoshlarim yashaydi, tug‘ilib o‘sgan yurtimga yana borishimni o‘ylashim kerak edi. Ertaga katta muammo bo‘lmasin deb, to‘yga ketishga majbur bo‘ldim.
Kecha “O‘zbekavo”ga borib, tushuntirish xatini yozdim. “Odil akaga aytganman” deyishimga qaramasdan rasmiy bildirish chiqarib yuborishdi.Pushaymonman, qiz bola boshim bilan bu masalaga yechim topa olmadim. Bir tomonga qarasam xalq to‘yi, bir tomonda davlat tadbiri, xalq ko‘tarilib ketishidan, misqollab yig‘gan obro‘yim to‘kilishidan qo‘rqdim. Yuragim og‘rib qoldi, to‘yda xizmatda vaqtimda ham dori ichib zo‘rg‘a bir ammallab to‘yni o‘tkazdim.
Shahnoza Otaboyeva
Izoh (0)