Luis Enrikedan bo‘shab qolgan “Barselona” bosh murabbiyi lavozimini Ernesto Valverde egalladi. Murabbiyni rasman tanishtirish marosimi 1-iyun kuni bo‘lib o‘tadi.
Valverdening klub ruliga kelayotgani haqidagi xabar bir hafta muqaddam chiqib bo‘lgan, mutaxassisning o‘zi Bilbaoning “Atletik” klubini tark etgandi. “Barselona” Ispaniya kubogida zafar quchib, Luis Enrike klub bilan xayrlashgach, jamoa prezidenti Xosep Mariya Bartomeu maxsus matbuot anjumanida Valverdening tashrifi haqida rasman ma’lum qildi.
Hozir Valverde juda baxtiyor. Unda jamoa bilan ijobiy natija qayd etish uchun barcha fazilatlar mujassam. Ernesto yoshlar futbolini yaxshi ko‘radi. Eng asosiysi uning qarashlari “Barselona” o‘yin uslubiga mos keladi.Xosep Mariya Bartomeu, “Barselona” prezidenti
53 yoshli Ernesto Valverde 1988—1990-yillar davomida futbolchi sifatida “Barselona” sharafini himoya qilgan. O‘z vaqtida u “Espanyol”, “Olimpiakos”, “Vilyarreal”, “Valensiya” kabi klublarni boshqardi. Murabbiy 2013-yil Bilbaoning “Atletik” klubi bilan shartnoma tuzib, shu vaqtga qadar jamoani boshqardi.
Valverde “Olimpiakos” bilan uch bor Gretsiya chempionligini va ikki marta mamlakat kubogini qo‘lga kiritgan. 2015-yil “Atletik” bilan Ispaniya Superkubogida zafar quchgan. O‘shanda Valverde shogirdlari “Barselona”ni birinchi uchrashuvda 4:0 hisobida taslim qilgan, javob o‘yinida esa 1:1 hisobi qayd etilgandi.
“Barselona” va Valverde hamkorligi 2 yilga mo‘ljallangan.
Izoh (0)