Shayxontohurda Gentra’ga o‘g‘rilikka tushgan jinoyatchi qo‘lga olindi

31-mart kuni soat 14:00 larda noma’lum shaxs Toshkent shahrining Shayxontoxur tumani hududida Gentra rusumli avtoulovning oynasini sindirib, fuqaro Madina Asqarovaga tegishli hujjatlarni va 1700000 so‘mlik shaxsiy mulkini o‘g‘irlagan edi. Ushbu jinoyatni sodir etgan shaxs yaqinda ushlandi. Bu haqda Toshkent shahar IIBB rasmiy sayti orqali ma’lum qilindi.

Mazkur holat bo‘yicha Shayxontoxur tuman IIB huzuridagi Tergov bo‘limi tomonidan JKning 169-moddasi 1-qismi va 227 moddasi 2-qismi “a” bandi (o‘g‘rilik hamda muhim shaxsiy hujjatlarni egallash va nobud qilish) alomatlari bilan jinoyat ishi qo‘zg‘atilgan edi.

Toshkent shahar IIBB xodimlari tomonidan o‘tkazilgan tezkor-qidiruv tadbirlari natijasida mazkur jinoyat Andrey Nikolayevich Grichenko tomonidan sodir etilganligi aniqlandi.

Grichenkoga nisbatan qamoqqa olish tarzidagi ehtiyot chorasi qo‘llanildi.

Hozirda dastlabki tergov harakatlari davom ettirilib, uning boshqa jinoyatlarga aloqadorligi tekshirilmoqda.