Farg‘ona viloyati hokimi tashrifidan so‘ng “Neftchi”dan ikki kishi bo‘shatildi va klub tepasiga Kapadze keldi

Farg‘onaning “Neftchi” futbol klubi raisi Rustam Abdullayev hamda klub katta murabbiyi Murod Ismoilov o‘z arizasiga ko‘ra ishdan bo‘shadi. Bu haqda “Neftchi” matbuot xizmati xabar berdi.

Ikki mutaxassisning o‘z arizasiga ko‘ra bo‘shashi Farg‘ona viloyati hokimi Shuhrat G‘aniyevning klub qarorgohida yig‘ilish o‘tkazgan kunga to‘g‘ri keldi. Yig‘ilish “Neftchi” Toshkentda “Lokomotiv”dan 0:4 hisobida yengilganidan so‘ng bo‘lib o‘tdi.

Matbuot xizmatining tan olib aytishicha, “Neftchi” 2017-yilgi mavsumni ko‘ngildagidek o‘tkaza olmayapti. Birinchi davra yakuniga 3 ta tur qolganida farg‘onaliklar turnir jadvalida 15-o‘rinni egallab turibdi.

“Neftchi”da katta o‘zgarishlar kuzatilishi katta ehtimol. Bu jarayon birinchi davra yakunida boshlanadi. Rahbariyat klub oldiga yuqori ko‘rsatkichlarni qayd etish vazifasini qo‘yib, unga rais etib Tohir Kapadzeni tayinladi. Yuqori ko‘rsatkich deyilganda aynan nimalar nazarda tutilganiga oydinlik kiritilmagan.

Ma’lumot uchun, Tohir Kapadze bunga qadar Farg‘ona viloyati futbol federatsiyasi vitse-prezidenti sifatida faoliyat ko‘rsatib kelayotgandi. “Neftchi” natijalariga javobgar kishilardan yana biri — bosh murabbiy Andrey Fyodorov vaqtinchalik jamoada saqlab qolindi. Yangi murabbiy topilsa, Fyodorov o‘z o‘rnini bo‘shatib beradi.

“Neftchi” O‘zbekiston kubogining chorak finaliga yo‘l olish uchun 31-may kuni “Navbahor” dovonidan o‘tib olishi kerak. Tomonlarnin Farg‘onada kechgan birinchi o‘yinida farg‘onalik futbolchilar 1:0 hisobida zafar quchgandi.