Bozorlar ma’muriyatlarining huquq, majburiyat va javobgarligiga aniqlik kiritildi
Moliya vazirligi va Davlat soliq qo‘mitasi qarori bilan “Bozorlar, savdo komplekslari va ularning filiallarida bir martalik yig‘imlar, ijara to‘lovlari hamda ko‘rsatilgan xizmatlar uchun to‘lovlarning o‘z vaqtida va to‘liq undirilishini tashkil etish va nazorat qilish tartibi to‘g‘risida”gi Nizomga tuzatishlar kiritildi. Bu haqda Norma xabar bermoqda.
Hujjatda bozorlar va ularning filiallari, shuningdek, ilgari umumiy ro‘yxatda keltirilgan savdo komplekslari va ularning filiallari daromadlari manbalari belgilab qo‘yildi.
Bozorlar va savdo komplekslarini boshqarish tartibi to‘g‘risidagi normalarga ham tuzatishlar kiritildi. Xususan, Nizomga sotuvchilar, bozorlar va savdo komplekslari ma’muriyatining huquq va majburiyatlari kiritildi.
Ma’muriyatning iste’molchilar huquqlarini himoya qilish to‘g‘risidagi qonun hujjatlari, o‘rnatilgan savdo qoidalari talablarini bajarmaslik, bozorlar va savdo komplekslarida savdo faoliyatini tashkil etish qoidalariga rioya etmaslik, jumladan, xodimlar tomonidan ularga rioya etilishi lozim darajada nazorat qilinmaganligi uchun javobgarligi haqida alohida aytib o‘tilgan.
Shuningdek, ular ijara to‘lovlari va ko‘rsatilgan xizmatlar uchun to‘lovlarni o‘z vaqtida va to‘liq undirmaganlik uchun hamda tegishli guvohnomaga ega bo‘lmagan jismoniy shaxslarga statsionar savdo shoxobchalarini taqdim etganlik uchun javobgarlikka tortiladi.
