Joylarda kam ta’minlangan, ayniqsa nogiron va mehnatga layoqatlilik darajasi cheklangan fuqarolarni moliyaviy qo‘llab-quvvatlash va ularning ish bilan bandligini ta’minlash maqsadida Prezident Shavkat Mirziyoyevning shaxsan bergan topshirig‘i asosida barcha hududlarda aholining mazkur qatlamiga beg‘araz asosda tikuv mashinalari va matolar topshirilmoqda. Bu haqda “Xalq bilan muloqot” guruhi Facebook’dagi sahifasida ma’lum qildi.
Joylarda o‘tkazilgan sayyor qabullarda bugungi kunda aholiga, ayniqsa nogiron va mehnatga layoqatlilik darajasi cheklangan aholi qatlamiga kichik biznes va xususiy tadbirkorlikni rivojlantirishga keng imkoniyatlar yaratilganligi va turli imtiyozlar berilganligidan kelib chiqqan holda, ularning tadbirkorlik bilan shug‘ullanishi bo‘yicha takliflar berilgan.
Jumladan, “O‘zpaxtasanoat” aksiyadorlik jamiyati “Paxtasanoat hududiy filiali” mas’uliyati cheklangan jamiyatlari va paxta tozalash korxonalari rahbarlariga aholining mazkur qatlami bilan hamkorlikda ishlash, ya’ni paxta terish etaklari hamda soha korxonalari uchun zarur bo‘lgan boshqa mahsulotlarni tikib berish bo‘yicha shartnomalar tuzish va tikuv mashinalari olib berish yuklatilgan.
Mazkur tashabbus doirasida 27-may kuni Andijon viloyatining Izboskan tumanida aholiga tikuv mashinalari va matolar tarqatildi.