Axborot va ommaviy kommunikatsiyalar sohasidagi Ekspert komissiyasining 25-yanvardagi bayonnomasi bilan O‘zbekistonga olib kirish, tayyorlash va tarqatish tavsiya etilmaydigan kompyuter o‘yinlari ro‘yxati tasdiqlandi. Bu haqda O‘zbekiston Intellektual mulk agentligi xabar bermoqda.
Ro‘yxatdan jami 34 ta kompyuter o‘yini o‘rin olgan bo‘lib (.pdf), ular orasida GTA: San Andreas, Mass Effect, Assasin’s Creed: Brotherhood, Fallout: New Vegas, Dead Space, Call of Duty: Black Ops, Mortal Kombat X, The Sims 3, 4 kabilarni uchratish mumkin.
Xabar berishlaricha, ushbu qaror “litsenziat, EHM uchun yaratilgan dasturlarni takrorlash, sotish va prokatga berish faoliyatini amalga oshirishda mualliflik huquqi va turdosh huquqlar to‘g‘risidagi qonun hujjatlariga majburiy rioya qilinishini hamda zo‘ravonlikni, pornografiyani, mamlakat xavfsizligi va ijtimoiy-siyosiy barqarorlikni, fuqarolar tinchligini, millatlararo va dinlararo totuvlikni buzishni, O‘zbekiston to‘g‘risida noto‘g‘ri axborotlar tarqatilishini hamda uning tarixiy, madaniy va ma’naviy boyliklari buzib ko‘rsatilishini targ‘ib qiluvchi EHM uchun yaratilgan dasturlarni sotishga yo‘l qo‘ymaslikni ta’minlash” maqsadida qabul qilingan.
“Barcha litsenziatlar nomlari keltirilayotgan kompyuter o‘yinlarining nusxalarini tayyorlanishiga, tarqatilishiga va prokatga berilishiga yo‘l qo‘ymasdan faoliyat olib borishlari talab etiladi”, — deyiladi agentlik axborotida.
Izoh (0)