Angliyalik bokschilar o‘zbekistonlik charm qo‘lqop ustalari bilan mashg‘ulot o‘tkazishni istab, Toshkentga keldi

25-may kuni O‘zbekiston va Angliya boks terma jamoalarining qo‘shma yig‘ini boshlandi, deb xabar berdi “Olamsport” nashri.

Bunda Angliya tomoni O‘zbekiston boks federatsiyasiga taklif bilan chiqib, ikki mamlakat bokschilari ishtirokida qo‘shma mashg‘ulot o‘tkazishni so‘ragan va so‘roviga ijobiy javob olgan. Natijada 15 nafar ingliz bokschi 6 nafar murabbiy hamrohligida Toshkentga yetib kelgan.

Qo‘shma mashg‘ulotlar 2-iyun sanasiga qadar davom etadi. Bunda O‘zbekiston termasi safida Rio—2016 sovrindorlari ham mashg‘ulotlarga kirishgan.

Shu yo‘l orqali har ikki mamlakat bokschilari bo‘lajak yirik musobaqalarga tayyorgarlik ko‘radi. Germaniya mezbonlik qiladigan Jahon chempionatiga o‘zbekistonlik o‘n bokschining barchasi yo‘llanma olgan bo‘lsa, angliyalik bokschilar Ukrainada o‘tadigan Yevropa chempionati uchun hozirlik ko‘radi.