Milliarder uchun sovg‘a: sotuvga qo‘yilgan eng qimmatbaho yaxtalar (fotogalereya)

Forbes bugungi kunda sotuvga qo‘yilgan eng yirik yaxtalar ro‘yxatini tuzdi. Undan Alisher Usmonov va Qatar amirining yaxtalari, palubadagi vertolyot uchun garaj, shuningdek, haftasiga ijara puli 1 million dollarga teng yaxtalar o‘rin oldi.

Jubilee

Uzunligi: 110 metr

Kemasozlik korxonasi: Oceanco (2017)

Bu Niderlandiyada qurilgan tarixdagi eng katta yaxtadir. U Qatar qirollik oilasi buyurtmasiga ko‘ra yasalgan. Yaxtaning oltita palubasidagi 16 ta kayutasi 31 mehmonni sig‘dira oladi. U yaqinda sotuvga qo‘yildi.

Ona

Uzunligi: 110 metr

Kemasozlik korxonasi: Lurssen (2008)

Dilbar yaxtasi rossiyalik milliarderga 2008-yilda yetkazib berilgan. 2016-yilda xuddi shu kemasozlik korxonasi Usmonovga Dilbar deb nomlangan boshqa, 156 metrli yaxtani ham yetkazdi. Bu vaqtda esa 110 metrli Dilbar Ona deb qayta nomlandi va sotuvga qo‘yildi.

Ulysses

Uzunligi: 107 metr

Kemasozlik kompaniyasi: Kleven (2016)

Narxi: 195 million dollar

Ushbu yaxtaning o‘ziga xos xususiyatlari qatorida yuqori palubadagi katta basseynni, vertolyot va boshqa “o‘yinchoq”lar uchun garajlarni, 21 metrli tender (yaxtadan qirg‘oqqa suzib boriladigan kater)ni tilga olish mumkin.

Faith

Uzunligi: 96,5 metr

Kemasozlik korxonasi: Feadship (2017)

Kengligi 14,5 metrli yaxtaning asosiy afzalliklari — bosh palubadagi basseyn va plyaj klubi, bar, hordiq zonasi, shuningdek, yaxta tumshug‘idagi vertolyot angari.

Athena

Uzunligi: 90 metr

Kemasozlik korxonasi: Royal Huisman (2004)

Narxi: 53 million dollar

Netscape asoschisi Jim Klark uchun qurilgan, dunyodagi eng katta yelkanli yaxtalardan biri. Uning machtasi tepasida tomosha maydonchasi bor.

O’Mega

Uzunligi: 82,5 metr

Kemasozlik korxonasi: Mitsubishi (2004)

Narxi: 57,9 million yevro

1985-yilda suvga tushirilgan O’Mega 2004-yilda Gretsiyadagi verf tomonidan superyaxtaga aylantirilgan. U 15 ta kayutasiga 32 kishini sig‘dira oladi va eng ommabop charter yaxtalardan biri hisoblanadi. Uni bir haftaga ijaraga olish 525 ming yevroga tushadi.

TV

Uzunligi: 78 metr

Kemasozlik korxonasi: Lurssen (2008)

Narxi: 92 million yevro

Yaxta dastlab Madsummer nomi ostida milliarder Jeffri Sofferga yetkazib berilgan. So‘ng u qishki davrda Karib orollarida haftasiga 1 million dollar ijara haqi bilan charter uchun berildi. Ayni paytda nomi TV’ga o‘zgartirilgan yaxta 92 million yevroga sotuvga qo‘yilgan.