Yaxna choy ajoyib tarzda chanqoqni bosadi, asab tizimiga ijobiy ta’sir ko‘rsatadi va ish qobiliyatini oshiradi. Yangi tayyorlangan sovuq choy – bu yozgi jazirama uchun mukammal ichimlik. U ham issiqdan himoya qiladi va ham tetiklashtiradi. Uni tayyorlash qiyin emas.
Foto: Depositphotos
Limonli yaxna choy
Masalliqlar:
Qora choy – 3—4 ch.q.
Suv – 1 l
Shakar yoki asal – 3 osh q.
Limon – 1 dona
Muz – ta’bga ko‘ra
Tayyorlash: Suvni qaynatamiz va quruq choy solamiz. Choyni damlaymiz va suzib olamiz. Yarimta limonning sharbatini siqib olamiz va choyga qo‘shamiz. Shakar sepamiz va yaxshilab aralashtiramiz. Limonning qolganini dumaloq shaklda kesamiz, idishga solamiz va ustiga tayyorlangan choyni quyamiz. Sovutgichda sovutamiz. Suzishdan oldin muz qo‘shamiz.
Mevali yaxna choy
Masalliqlar:
Olma – 1/3 dona
Nok – 1/3 dona
Shakar – 1,5 ch.q.
Yangi damlangan qora choy – 250 ml
Muz – ta’bga ko‘ra
Tayyorlash: Olma va nok bo‘laklarini mayda qilib to‘g‘raymiz. Madler yoki sheykerda maydalaymiz. Shakar, muzni qo‘shamiz va ustidan yangi damlangan achchiq choyni quyamiz. Ichimlikni yaxshilab aralashtiramiz. Sovitilgan mevali choyni muz solingan piyolalarga quyishdan oldin suzib olamiz. Salqinlatuvchi ajoyib ichimlik tayyor!
Rezavor mevali yaxna choy
Masalliqlar:
Gazli suv – 2 piyola
Suv – 500 ml
Qora choy – 2 ch.q.
Malina – 2 piyola
Shakar – ta’bga ko‘ra
Laym, yalpiz – bezak uchun
Tayyorlash: Malinani blenderda maydalaymiz, shakar qo‘shamiz, muz uchun formalarga quyamiz va muzlatamiz. Choy damlaymiz va sovitamiz. Katta idishda sovuq choy va gazli suvni aralashtiramiz, malinaning muzlagan bo‘laklarini qo‘shamiz. Laym bo‘laklari va yalpiz barglari bilan bezaymiz.
Izoh (0)