O‘rtayer dengizida qutqaruvchilar ko‘z o‘ngida 30 nafardan ortiq muhojir cho‘kib ketdi

O‘rtayer dengizida muhojirlar kemasi cho‘kishi oqibatida 30 dan ortiq kishi halok bo‘ldi. Bu haqda Reuters ma’lum qildi.

Fojia Liviya qirg‘oqlari yaqinida ro‘y berdi. Bortida 200 nafarga yaqin yo‘lovchi bo‘lgan kema Italiyaga ketayotgandi.

Uni Italiya qirg‘oq himoyasi qutqaruv kemasi payqadi va muhojirlar tomon yo‘l oldi. Ular yaqinlashganda kema birdaniga qiyshayishni boshladi. Undagi qutqaruv nimchasi bo‘lmagan kishilar o‘zini suvga otdi va Italiya kemasi tarafiga suza boshladi.

Ko‘pchilik omon qolishga muvaffaq bo‘ldi, biroq 30 dan ortiq odam, asosan 3 yoshgacha bo‘lgan bolalar halok bo‘ldi. Qurbonlarning aniq soni ma’lum emas, jasadlarni qidirish davom etmoqda.