Xitoy Suriyaga “Bir makon, bir yo‘l” loyihalarini amalga oshirishda yordam beradi

Xitoy rasmiylari kelgusida Suriyaga “Bir makon, bir yo‘l” tashabbusi doirasida gumanitar loyihalarni amalga oshirish uchun yordam taqdim etish niyatida. Bu haqda Xitoyning Damashqdagi elchisi Si Syanszin ma’lum qildi, deya xabar beradi “TASS”.

“Xitoy ‘Bir makon, bir yo‘l’ loyihalari doirasida Suriyani qo‘llab-quvvatlashni davom ettiradi. Mazkur konsepsiya nafaqat Xitoy, balki barcha ishtirokchi davlat uchun manfaat keltiradi. Ta’bir joiz bo‘lsa, bu alohida pyesa emas, balki barcha manfaatdor tomonlar ijro etadigan simfoniyadir”, — deya ta’kidladi elchi.

Fevral oyida Pekin va Damashq Suriyaga beg‘araz asosda 16 million dollar miqdoridagi gumanitar yordam taqdim etish to‘g‘risida ikki kelishuvni imzoladi. Tomonlar suv resurslari, qishloq xo‘jaligi, sog‘liqni saqlash, turizm, neft va gaz sohalaridagi hamkorlik bo‘yicha turkum shartnomalar tuzdi.