Singapur politsiyasi mamlakatda Red Bull kompaniyasi (Tailand) asoschining nabirasi Vorayut Yuvittxayya yashiringani haqidagi xabarlarni rad etdi. Bu haqda “TASS” xabar bermoqda.
“Bu borada tarqalgan xabarlar haqiqatga to‘g‘ri kelmaydi. Tailand rasmiylariga Singapur qonunchiligiga binoan zarur ko‘mak beriladi”, — deya ta’kidladi politsiya vakillari.
Tailand sudi 28-aprel kuni 2012-yilda Ferrari avtomobilida politsiya xodimini urib yuborib, o‘limiga sabab bo‘lgan, o‘zi esa voqea joyidan yashiringan 31 yoshli Yuvittxayyani qamoqqa olishga order berdi.
OAVga ko‘ra, mol-mulki 9,7 milliard dollarga baholanadigan Chaleo Yuvittxayyaning merosxo‘ri order berilishidan uch kun avval shaxsiy samolyotida Singapurga uchgan va u yerdan noma’lum yo‘nalishda g‘oyib bo‘lgan.
Qirollik milliy politsiyasi rahbari Chaktip Chaichinda Vorayut Yuvittxayya Interpol qidiruviga berilishini ma’lum qildi.