Profilaktika kunida Toshkent shahrining Sergeli tumanidagi oilalardagi turli muammolar ko‘rib chiqildi, deb xabar bermoqda O‘zA.
Sergeli tumani ichki ishlar boshqarmasi boshlig‘i Zafar Otayevning aytishicha, sodir bo‘layotgan huquqbuzarliklarni shu kunning o‘zida mahallada muhokama qilish yo‘lga qo‘yildi.
“Profilaktika kuni doirasida ‘Quruvchilar’ mahallasida o‘zaro kelisha olmagan qaynona—kelin munosabati muhokama etildi. Mahalladoshlari oldida o‘rtaga chiqqanidan qaynona xijolat tortdi, o‘ziga ancha bino qo‘ygan kelinda esa bu holat avvaliga kuzatilmadi. Yoshi ulug‘lar tomonidan vaziyatga baho berilib, kelinchakning turishi tanqidga, tarbiyaga muhtojligi haqida fikr yuritilgach, kelinning boshi egilib, ko‘ziga yosh kelib, kechirim so‘radi”, — deyiladi O‘zA xabarida.
Profilaktika kuni munosabati bilan Sergeli tumanidagi ta’lim muassasalarida davomat, tushuntirish-targ‘ibot ishlari bilan birga yong‘in, yo‘l harakati xavfsizligi, qo‘riqlash xizmati xodimlarining profilaktik chora-tadbirlari ham amalga oshirildi.