Uzbek Tigers – China Dragons 2:0. Murodjon Ahmadaliyev Qozog‘istondagi xatosini to‘g‘riladi
Butunjahon boks seriyasi (WSB)ning VII mavsum “C” guruhi 4-turi doirasida O‘zbekistonning Uzbek Tigers jamoasi Toshkentdagi “O‘zbekiston” sport majmuasida Xitoyning China Dragons bokschilariga qarshi bahs olib bormoqda.
Navbatdagi jangda – 60 kilogrammga vazndagi bokschilar bahs olib bordi. Rio–2016 Olimpiya o‘yinlari sovrindori Murodjon Ahmadaliyev xitoylik Sen Vangga qarshi jang qilib, 3:0 hisobida zafar quchdi. Uchinchi raundda o‘zbekistonlik bokschi raqibini nokdaunga uchratishga muvaffaq bo‘ldi.
Ta’kidlash joiz, Murodjon Ahmadaliyev 18-fevral kuni Astana Arlans’ga qarshi bellashuvda Qozog‘iston vakili Zokir Safiullinga 0:3 hisobida yutqazib qo‘ygandi. Bugun Rio–2016 sovrindori avvalgi xatosini to‘g‘rilashga erishdi.
Avvalroq -52 kilogramm vazn toifasida Abrorjon Qodirov ishonchli tarzda Yong Changni mag‘lubiyatga uchratgani haqida ma’lum qilingandi.
Mazkur bellashuvdan keyin Uzbek Tigers hisobni oshirdi – 2:0. Navbatdagi janglar quyidagi ko‘rinishni olgan:
-69 kilogramm: Shahram G‘iyosov – Vey Liu;
-81 kilogramm: Bektemir Meliqo‘ziyev – Jiabin Xuang;
+91 kilogramm: Bahodir Jalolov – Xaypeng Mu.
Eslatib o‘tamiz, WSB doirasida Uzbek Tigers 2017-yil hisobidan uchta jang o‘tkazdi. O‘zbekistonlik bokschilar avvaliga Xitoyda China Dragons’dan 2:3 hisobida yengilgan bo‘lsa, keyinroq Qozog‘istonda Astana Arlans’ga 1:4 hisobida imkoniyatni boy bergandi. Toshkentda bo‘lib o‘tgan 3-turda Uzbek Tigers Rossiyaning Patriot Boxing Team jamoasini 5:0 hisobida taslim qilgandi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
