Dunyodagi eng qimmat avtomobillar qatoriga tayyorlanish jarayonida oltindan foydalanilgan avtoulovlar kirishi, shubhasiz. “Motor” nashri turli qismlarida oltin ishlatilgan avtomobillar fotojamlanmasini taqdim etdi.
McLaren F1
Formula-1 muhandisi Gordon Marri tomonidan loyihalashtirilgan McLaren F1 vaznini yengillashtirish va dvigatel samaradorligini oshirish uchun ortiqcha detallardan voz kechilgan. Avtomobilda na ABS, na rulning gidrokuchaytirgichi bor. Konditsioner va audiotizim uzoq bahslardan so‘ng o‘rnatilgan.
Marri dvigatelning yuqori ishchi harorati karbonli kuzovga zarar yetkazadi deb hisoblagan, oltin esa dunyodagi haroratni qaytaruvchi eng yaxshi material. Natijada har bir “Maklaren” motor qismining issiqlik izolyatsiyasi uchun 24 karatli 16 gramm qimmatbaho metal sarflangan.
Lykan HyperSport
Lykan HyperSport’ning 3,7 litr sig‘imli 780 ot kuchiga ega dvigateli juda kuchli bo‘lsa ham, avtoulovda oltin issiqlik qaytaruvchi sifatida ishlatilmagan. Qimmatbaho metall mashina salonini bezash uchun qo‘llanilgan.
Aniqrog‘i, oltin mijozning xohishiga ko‘ra qo‘llaniladi: buyurtmaga ko‘ra arab superkarining o‘rindiqlari oltin iplar yordamida tikilgan, yoritish qurilmalari esa olmoslar bilan bezatilgan. Yetti nusxada yig‘ilgan avtomobillarning biri Dubay politsiyasiga tegishli.
Koenigsegg Agera S Hundra
Agera Hundra modeli yagona nusxada gongkonglik kolleksioner uchun tayyorlangan va Koenigsegg markasining yuzinchi avtomobili hisoblanadi. Mashina nomidagi Hundra aynan shuni anglatadi. Giperkar taqdimoti 2013-yilda Jeneva avtosalonida bo‘lib o‘tgan.
Hundra modelining o‘ziga xos farqli tomoni shundaki, karbonli kuzov chiziqlari va qanotlarning pastki chiziqlari 24 karatli oltin bilan chizilgan. Oltin tutun chiqarish trubasi atrofida ham ishlatilgan.
Mansory kompaniyasi loyihani 2010-yilda Bugatti Veyron asosida yaratdi. Avtomobil yoqilg‘i baki qopqog‘ining atrofi, radiator panjarasi, g‘ildirak diskalari, orqani ko‘rsatuvchi tashqi oyna korpusi qimmatbaho metall bilan qoplangan.
Vincero d’Oro yagona nusxada yig‘ilgan. Oltin iplar avtomobil salonida ham ishlatilgan. Bunda Veyron’ning bir qator elementlari to‘liq qayta ishlangan.
TopCar Porsche Panamera Turbo S Stingray GTR
Tyuning-loyiha Rossiyaning TopCar kompaniyasi tomonidan 2011-yilda yaratilgan. U shaxsiy buyurtma asosida yig‘ilgan Porsche Panamera’ni aks ettiradi. Avtomobilning umumiy qiymati 567 850 dollarni tashkil qiladi. Bundan qariyb 205 ming dollari tyuning detallari uchun sarflangan.
Panamera tashqi ko‘rinishi Stinger GTR qoplamasi va qora rangi bilan ajralib turadi. Mashinaning o‘rindiqlari timsohning oq terisi bilan qoplangan, Karel qayinidan tayyorlangan qismlar, shuningdek, oltindan tayyorlangan tezlik uzatish qutisi qismi, eshik ochgichlar, eshik kartalari va markaziy qurilmalar qismi salonga o‘zgacha ko‘rinish bergan.
Carlsson CS50 Versailles
Versal saroyida bo‘lgani kabi Carlsson CS50 Versailles ham ichki va tashqi tomondan oltin bilan qoplangan. Kompaniya 25 ta shunday mashina ishlab chiqqan. Ularning asosiy qismi Xitoy va Yaqin Sharq mamlakatlariga sotilgan.
Kuzovdagi ingichka oltin qoplamasi maxsus cho‘tkalar yordamida hosil qilingan. Avtomobil saloni oltin bilan qoplangan elementlar, shokolad va yorqin tilla jiloli tabiiy Nappa terisi bilan bezalgan. Har bir Carlsson CS50 Versailles, taxminan, 500 ming dollar turadi.
Ueli Anliker Mercedes McLaren SLR 999 Gold Dream
Mashina Veyron LINEA Vincero d’Oro kabi 2010-yilda taqdim etilgan. U McLaren SLR asosida yaratilgan. Ustalarning 35 000 soatlik ishlaridan so‘ng superkar haqiqiy metallga aylandi. Oltin ulovning hamma joyida ishlatilgan: diska, salon, bo‘yoq.
700 ot kuchigacha kuchaytirlgan V8 dvigateli “Oltin orzu”ni soatiga 350 kilometr tezlikda harakatlanishiga imkon beradi. Avtomobil 2011-yilda 11 million dollar narx bilan savdoga chiqarilgan.
Mercedes McLaren SLR White Gold
Atrofida turli mish-mishlar aylanib yuradigan ertaknamo McLaren’ni Monako va Dubay ko‘chalarida tez-tez uchratish mumkin. Bir qator manbalarga ko‘ra, superkar kuzovi to‘liqligicha oq oltin bilan qoplangan. Savol tug‘iladi: mashina Amirliklardagi 50 daraja issiqqa qanday bardosh beradi?
Ma’lumotlarga ko‘ra, superkarga 1600 ot kuchiga ega to‘rt turbinali V10 dvigateli o‘rnatilgan. Anig‘i shuki, avtomobil BAAlik milliarderga tegishli.
Tata Nano Goldplus
Qanday qilib dunyodagi eng arzon avtomobilni Bugatti Veyron’dan ikki marta qimmat mashinaga aylantirish mumkin? Butun kuzovi oltin bilan qoplangan superkar savolga javob beradi. Avtomobilni yig‘ishda oltindan tashqari olmos, rubina va kumushdan ham foydalanilgan.
Kuzov ustida amalga oshirilgan o‘ziga xos ish Nano kompaniyasi tomonidan amalga oshirilgan. Mashinaning narxi 4,6 million dollar hisoblanadi. Bu nusxa sotuvga chiqarish uchun mo‘ljallanmagan bu Tata kompaniyasining Land Rover va Jaguar’ni sotib olgani uchun o‘z-o‘ziga sovg‘asi bo‘lgan.
Rolls-Royce Silver Spur
Bruney sultonining nikoh marosimlari uchun yaratilgan Rolls-Royce 14 million dollarga baholangan. Silver Spur oxirgi marta sulton Xassanal Bolkiaxning qizi turmushga chiqayotgan vaqtda harakatlangan. Noodatiy ulov kuzov aylanasi bo‘ylab oltin naqshlar bilan qoplangan.
Bruney sultoni Xassanal Bolkiax dunyodagi eng boy kishilardan biri hisoblanadi. Uning avtomobil kolleksiyasida yetti mingdan ortiq mashina bor, ularning katta qismi yagona nusxada tayyorlangan.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)