Peugeot, Mercedes-Benz, Skoda… Dunyoga mashhur avtomobillar nomlari qanday kelib chiqqan?
Skoda haqida gapirsak, bu juda oddiy — marka uning asoschisi, Emil Shkoda sharafiga nomlangan. Emblemasi esa 1926-yilda paydo bo‘lgan. Uning muallifi deya Pilsen ŠKODA firmasining tijorat direktorini tilga olishadi. U Amerikada bo‘lib, hindularning mistik sirlariga shunchalik qiziqib qolganki, ularni yangi avtomobil firmasining lavhasiga joylashtirishni taklif qilgan.
Mercedes-Benz tarixi ancha chalkash. Dastlab G. Daymler va K. Bens XIX asrning 80-yillarida birinchi avtomobillarni ishlab chiqarish bo‘yicha ikkita raqobatchi firmani yaratdi. Biznesmen Emil Yellinek 1901-yilda Daymlerga sport avtomobilini buyurtma qildi va uni o‘z qizi sharafiga Mercedes deb atadi. 35 ot kuchiga teng avtomobil muaffaqiyatli chiqdi va uni seriali ishlab chiqarishga qaror qilishdi, Mercedes nomi esa butun firma bilan bog‘liq bo‘lib qoldi. Jahon moliya inqirozi davrida 1926-yilda Daimler va Benz firmalari hozirgi Mercedes-Benz nomi ostida birlashdi.
Fransiyaning Peugeot kompaniyasi aslida tegirmonlar orqali tanilganini ko‘pchilik bilmasa kerak. 1810-yilda tegirmonchi aka-uka Pejolar suv tegirmonlaridan birini sanoat manufakturasiga aylantirdi. 1825-yildayoq Peugeot firmasi bir nechta korxonalarga egalik qilgan. 1882-yilda firmada diametri 1,86 metrga teng ulkan old g‘ildirakli birinchi velosipedlarni ishlab chiqarish yo‘lga qo‘yildi. Peugeot’ning birinchi avtomobili esa Serpollet bug‘ mashinasi bo‘ldi, u Fransiya inqilobining 100 yilligi arafasida Parij ko‘rgazmasida taqdim etildi.
Yana bir sirli familiya boshqa bir brend, aniqrog‘i Amerikaning Cadillac brendi nomida qatnashgan. 115 yil avval muhandis Genri Liland sifatli brendni yaratish ustida endi o‘ylayotgan vaqtda, bu g‘oya uning ko‘plab hamkasblari tomonidan allaqachon sinab ko‘rilgan edi. Orzuni ro‘yobga chiqarish ustida mutaxassislarning butun bir jamoasi, shu jumladan, Genri Ford ishlagan, shu tufayli bitta familiyani ajratib ko‘rsatish iloji bo‘lmagan. Ta’sischilar kengashi brendni XVII asrning dong‘i chiqqan qahramoni, hindular bilan jang qilib, Detroit shahriga asos solgan aristokrat Antuan de lya Kadiyak sharafiga nomlashga qaror qildi. De lya Kadiyak avlodining gerbi esa marka logotipiga aylandi.
Izoh (0)