Keynning xet-trigi hamda Ibrahimovichning najot goli “Tottenhem” bilan “Yunayted”ni kubok keyingi bosqichiga olib chiqdi

Dam olish kunlari Angliyada mamlakat kubogining chorak finaliga yo‘l olish uchun kurashlar bo‘lib o‘tdi.

Shanba oqshomida Londonning “Chelsi” klubi bu missiyani muvaffaqiyatli hal qilgan bo‘lsa, 19-fevralga kelib ular safiga “Tottenhem” va “Manchester Yunayted” klublari ham qo‘shildi.

“Shporlar” Londonning o‘zida “Fulhem” bilan bellashib, Harri Keyn tomonidan urilgan uchta gol sabab navbatdagi bosqich chiptasini hal qila oldi.

“Manchester Yunayted” esa “Blekbern Rovers” klubi dovonidan o‘tdi. Uchrashuv 1:1 bo‘lib turgan bir paytda Joze Mourinyo maydonga Pol Pogba hamda Zlatan Ibrahimovichni tushirdi. 10 daqiqadan keyin ulardan biri golli uzatmani amalga oshirdi, ikkinchisi “Yunayted”ni chorak finalga olib chiqqan golga mualliflik qildi.

Bugun — 20-fevral kuni nimchorak finaldagi so‘nggi uchrashuv o‘tib, Londonning “Arsenal” klubi safarda “Satton Yunayted” bilan bellashadi. 28-fevral kuni esa “Manchester Siti” o‘z maydonida “Xaddersfild Taun”ni qabul qiladi. Tomonlarning birinchi uchrashuvida 0:0 hisobi qayd etilgandi.

Angliya kubogi 1/8 final 19-fevral, yakshanba

“Blekbern” — “Manchester Yunayted” 1:2

“Fulhem” — “Tottenhem” 0:3

20-fevral, dushanba“Satton Yunayted” — “Arsenal”