Miss chess Eurasia so‘rovnomasida qozog‘istonlik shaxmatchi Jansaya Abdumalikdan kamroq ovoz to‘plab, yakunda 2-o‘rin bilan cheklangan o‘zbekistonlik shaxmat ustasi Sarvinoz Qurbonboyeva “Daryo” nashriga intervyu berdi.
Avvalroq Facebook’ning o‘zbekistonlik foydalanuvchilari so‘rovnoma halol kurashlar ostida o‘tganiga shubha bilan qaragan bo‘lsa, mazkur postga izoh qoldirgan boshqa bir foydalanuvchi chess.pw sayti egasining yonini olib, u kishi grossmeysterlarning oldidan o‘tganini qayd etgandi.
“Ular menga Facebook messenjeri orqali yozishgandi. Tanlovga nomzodingizni qo‘ysak qarshi emasmisiz, deb so‘rashgan. Men esa roziligimni bergandim”, — deb gap boshladi shaxmatchi.
“Yozgan odam qozog‘istonlik. Ismi Marat Mulku. Men ularni taniyman va hurmat qilaman. Qozog‘istondagi musobaqada ishtirok etganimda yuzma-yuz ko‘rishgandik. U odam o‘z profilida shaxmat yangiliklarini yozib boradi. Sayt haqida esa ma’lumotga ega emasman, feyk bo‘lmasa kerak, yana bilmadim”.
Sarvinoz Qurbonboyeva qozog‘istonlik o‘sha kishi tomonidan yuritiladigan saytga tashrif buyuruvchilarning 53 foizi foizi O‘zbekistondan va faqatgina 11 foizi Qozog‘istondan ekanidan voqif etildi. “Bu qiziq bo‘ldi-ku”, — deb kulib javob berdi shaxmatchi qiz. Biroq bundan ajablanmaganini qayd etdi.
“Ajablandim. Ularda ko‘proq kishi ovoz bergan bo‘lsa kerak, deb o‘yladim”.
Izoh (0)