“Bunday uylarni Toshkentning 10 tumanida 10 tadan qurishni rejalashtirmoqdamiz”. Shavkat Mirziyoyev Sergelida qurilayotgan ko‘p qavatli uylar bilan tanishdi

O‘zbekiston Prezidenti Shavkat Mirziyoyev 3-fevral kuni Sergeli tumanida bunyod etilayotgan zamonaviy ko‘p qavatli uy-joylar bilan tanishdi, deya xabar bermoqda O‘zA.

Sergeli tumanida 2016—2017-yillar rejasiga asosan 4284 xonadondan iborat 102 zamonaviy ko‘p qavatli uy-joy qurish ishlari amalga oshirilmoqda.

“Mazkur yirik loyiha oilalarning turar joyga bo‘lgan ehtiyojini qondirish imkonini yaratadi. E’tiborlisi, uylar oilalarga imtiyozli ipoteka krediti orqali beriladi”, — deyiladi O‘zA axborotida.O‘zbekiston mustaqilligining 26 yilligi arafasida ushbu uy-joyning 66 tasini foydalanishga topshirish ko‘zda tutilgan. Shuningdek, ta’lim muassasalari, kichik biznes va tadbirkorlik subyektlari, aholiga maishiy xizmat ko‘rsatish shahobchalari ham barpo etiladi.

Asosiy maqsadimiz — odamlarga qulaylik yaratish, ularning turmush farovonligini yuksaltirish. Mazkur uy-joylar taqsimotida adolat mezoniga qat’iy rioya etilishi kerak. Shunda xalqimizning kayfiyati yaxshi, hayotdan rozi bo‘ladi. Ertangi kunga ishonchi ortadi. Aholining ehtiyoji, talabidan kelib chiqib bunday uylarni Toshkent shahrining 10 tumanida 10 tadan qurishni rejalashtirmoqdamiz.

Shavkat Mirziyoyev, O‘zbekiston Prezidenti

Shavkat Mirziyoyev mutasaddi rahbarlar va mutaxassislarga mazkur inshootlarni bugungi kun talablariga to‘la javob beradigan puxta loyihalar asosida qurish, ularni eng zamonaviy infratuzilmalar bilan ta’minlash bo‘yicha zarur tavsiyalar berdi.Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.