Aleksandr Tkachyov va Elyor G‘aniyev Moskvada fitosanitar talablarga rioya etish haqidagi protokolni imzoladi

Rossiya Qishloq xo‘jaligi vaziri Aleksandr Tkachyov va O‘zbekiston Tashqi iqtisodiy aloqalar, investitsiyalar va savdo vaziri Elyor G‘aniyev Moskvada fitosanitar talablarga rioya etish haqidagi protokolni imzoladi. Hujjat ikki davlat fitosanitar xizmatlari o‘rtasida o‘simliklar karantini borasidagi hamkorlikni mustahkamlashga qaratilgan, deb xabar beradi UzDaily.

Shuningdek, uchrashuv davomida Rossiya va O‘zbekiston o‘rtasida qishloq xo‘jalik hamda oziq-ovqat mahsulotlari savdosini rivojlantirish masalalari muhokama qilindi.

Rossiya qishloq xo‘jaligi vazirligi matbuot xizmatiga xabariga ko‘ra, ikki mamlakat orasidagi qishloq xo‘jalik mahsulotlari aylanmasi 2016-yilda salkam 20 foizga ko‘payib, 398 million dollarni tashkil etdi (2015-yilda 334 million dollar). Rossiyaning O‘zbekistonga eksporti 284,8 million, O‘zbekistonning Rossiyaga eksporti esa 113,7 million dollardan iborat bo‘ldi.

Aleksandr Tkachyov Rossiya tomoni O‘zbekistonga bug‘doy, baliq va baliq mahsulotlari, urug‘lik kartoshka, soya urug‘i hamda qandolat mahsulotlari yetkazib berishdan manfaatdorligi, mahalliy ishlab chiqaruvchilar shakar va yog‘-moy mahsulotlari eksportini bir necha karra oshirishga tayyorligini bildirdi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.