Xurshid Mirzohidov O‘zbekiston Milliy teleradiokompaniyasi rahbariga aylandi. Bu haqda UzDaily xabar bermoqda.

Foto: UzReport

Foto: UzReport

Mirzohidov bungacha O‘zbekiston axborot texnologiyalari va kommunikatsiyalarini rivojlantirish vaziri lavozimida mehnat qilib kelayotgan edi.

Mirzohidovga qadar O‘zMTRKga Alisher Xodjayev raislik qilib kelayotgan edi.

Xurshid Mirzohidov haqida

Xurshid Mirzohidov 1971-yil Toshkent shahrida tug‘ilgan. 1995-yili Toshkent elektrotexnika aloqa institutini radioaloqa, radoieshittirish va televideniye muhandisi mutaxassisligi bo‘yicha, 2004-yili Prezident huzuridagi Davlat va jamiyat qurilish akademiyasi Oliy biznes maktabini biznesni boshqarish magistri unvoni bilan tamomlagan.

1994—1999-yillarda aloqa va axborotlashtirish sohasidagi korxonalarda turli lavozimlarda ishlagan. 1999—2001-yillarda Pochta va telekommunikatsiyani rivojlantirishni davlat tomonidan qo‘llab-quvvatlash jamg‘armasida bo‘lim boshlig‘i va jamg‘arma direktori lavozimlarida ishlagan.

Mirzohidov 2001—2002-yillarda “O‘zbektelekom” bosh direktori o‘rinbosari, 2002—2003-yillarda Vazirlar Mahkamasi Aloqa va axborot texnologiyalari kompleksi rahbari kotibiyati mudiri, 2003—2004-yillarda Aloqa va axborotlashtirish agentligi bosh direktori o‘rinbosari lavozimlarida ishlagan.

2004—2006-yillarda Vazirlar Mahkamasi Axborot tizimlari va telekommunikatsiyalar masalalari axborot-tahlil departamenti mudiri, 2006—2009-yillarda “O‘zprommashimpeks” kompaniyasi rahbari lavozimlarida faoliyat olib borgan.

Xurshid Mirzohidov 2009—2010-yillarda O‘zMTRK raisi birinchi o‘rinbosari, 2010—2012-yillarda O‘zbekiston Aloqa va axborotlashtirish agentligi bosh direktori birinchi o‘rinbosari sifatida ishladi.

2012-yilning fevral oyida Xurshid Mirzohidov Aloqa va axborotlashtirish agentligi bosh direktori etib tayinlandi. Uning rahbarligi ostida agentlik dastlab Aloqa, axborotlashtirish va telekommunikatsiya texnologiyalari davlat qo‘mitasiga (2012-yil, oktabr), keyinchalik Axborot texnologiyalari va kommunikatsiyalarini rivojlantirish vazirligiga (2015-yil, fevral) aylantirildi.

Alisher Xodjayev haqida

Alisher Xodjayev qariyb 12 yil O‘zMTRKga raislik qildi. U 1963-yili Toshkent viloyatida tavallud topgan bo‘lib, 1985-yili Samarqand davlat universitetini fizika o‘qituvchisi mutaxassisligi bo‘yicha tamomlagan.

Xodjayev 1985—1993-yillarda O‘zbekiston Fanlar akademiyasi tizimidagi ilmiy-tekshirish institutlari, ishlab chiqarish birlashmalarida faoliyat olib borgan. 1993—1996-yillarda NKK firmasida tizim muhandisi bo‘lib ishlagan.

Alesher Xodjayev 1996-yildan rahbarlik lavozimlarida faoliyat olib borgan. Jumladan, 1998-yilga qadar “KomUzAziya” kompaniyasida, 1998—2001-yillarda esa UzPAK kompaniyasida bosh direktor lavozimida mehnat qilgan.

2001—2002-yillarda O‘zbekiston Prezidenti huzuridagi Milliy xavfsizlik kengashi kotibi o‘rinbosari, 2002—2005-yillarda O‘zbekiston Aloqa va axborotlashtirish agentligi (hozirgi Axborot texnologiyalari va kommunikatsiyalarini rivojlantirish vazirligi)ning rahbari o‘rinbosari sifatida faoliyat ko‘rsatgan.

Alisher Xodjayev 2005-yilning 15-aprel kuni O‘zbekiston Teleradiokompaniyasi raisi etib tayinlangan edi. U 11 yil 9 oy davomida O‘zMTRKga rahbarlik qildi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.