O‘zbekiston kasaba uyushmalari Federatsiyasi delegatsiyasi Xalqaro mehnat tashkiloti (XMT) Sharqiy Yevropa va Markaziy Osiyo mamlakatlari byurosi taklifiga ko‘ra Italiyaning Turin shahrida o‘tkazilgan “O‘zbekiston, Qozog‘iston va Ozarbayjon mamlakatlarining davlat bandlik xizmatlari salohiyatini rivojlantirish” mavzusidagi o‘quv-seminarda qatnashdi. Bu haqda Federatsiya matbuot xizmati xabar bermoqda.
O‘quv-seminari O‘zbekiston, Qozog‘iston va Ozarbayjondan kelgan uch tomonlama hamkorlar — hukumatlar, xodimlar va ish beruvchilar vakillari uchun tashkil etildi. Unda mehnat munosabatlari sohasida faoliyat ko‘rsatayotgan dunyo miqyosidagi yetakchi mutaxassislar o‘z taqdimotlari bilan qatnashdi.
Seminarda ishtirokchilar “O‘zbekiston, Qozog‘iston va Ozarbayjon mamlakatlarida bandlik xizmatlari”, “Mehnat bozorining axborot tizimlari”, “Kasbga yo‘naltirish: uslubiyot va usullar” kabi ko‘plab mavzular bo‘yicha ma’ruzalar bilan tanishdi.
XMT xalqaro o‘quv markazi rahbari o‘rinbosari Yordanka Svetkovaning ta’kidlashicha, o‘zbekistonlik uch tomonlama hamkorlar vakillari o‘zlarining yuqori darajadagi tayyorgarligi va mehnat bozori muammolarini hal etishda ijodiy yondashuvini namoyon qildi.
O‘quv seminari jarayonida O‘zbekiston, Qozog‘iston va Ozarbayjon vakillari mehnat sohasidagi mavjud muammolar va ularni xalqaro tajriba asosida hal etish yo‘llari to‘g‘risida fikr almashdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.