O‘zbekiston Vazirlar Mahkamasi xo‘jalik subyektlari tomonidan xorijiy valyutadagi tushumning majburiy sotilishi tartibiga o‘zgarish kirituvchi qaror qabul qildi. Bu haqda “Gazeta.uz” xabar bermoqda.
Oldin markazlashmagan eksportni amalga oshiruvchi korxonalar vakolatli banklarga xorijiy valyutadagi tushumning 50 foizini sotishga majbur bo‘lgan bo‘lsa, endi bu talab teng yarmi, ya’ni 25 foizga qisqardi.
Mazkur o‘zgarishdan 16 turdagi mahsulot va xizmatlar istisno. Bu ro‘yxatga bug‘doy, oltingugurt, tabiiy gaz va neftgaz sohasining boshqa mahsulotlari (jumladan, tranzit), uran, polietilen, polipropilen, qora metall, mis va rux, vodorod, inert gazlar va boshqa nometallar, qimmatbaho bo‘lmagan metallar, metallokeramika hamda boshqalar kirdi. Ularning eksportini amalga oshiruvchi subyektlar avvalgidek xorijiy valyutadagi tushumning 50 foizini majburiy tartibda sotadi.
Ro‘yxatga, shuningdek, avia va temiryo‘l transporti, telekommunikatsiya va bank xizmatlari kiritilgan.
Ma’lumot uchun, valyuta tushumini majburiy sotishdan tayyor mahsulotni eksport qiluvchi to‘qimachilik korxonalari va o‘zi ishlab chiqargan mahsulot hamda xizmatlarni eksport qiluvchi kichik biznes subyektlari ozod qilingan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.