2017-yil 28-yanvarda Xitoyda nishonlanadigan Yangi yilni uyida kutib olishni juda qattiq xohlagan Jichjao okrugida yashovchi xitoylik kishi pul yetishmasligi sabab uyiga velosipedda yo‘lga chiqdi, deb “Jenmin jibao” nashriga asoslanib, TJournal xabar berdi.
U 1700 kilometr masofani bosib o‘tib, Sitsikar shahriga yetib borishi lozim edi.
Xitoylik kishi 500 kilometr masofani bosib o‘tgach teskari tomonga qarab ketayotganini tushundi. Sayohatchini Anxoy provinsiyasida to‘xtatgan politsiya xodimlari uning o‘zi rejalashtirganidek shimolga emas, balki mamlakatning janubiy tomoniga qarab ketayotganini aytgan. Velosipedchi bu yo‘lni bosib o‘tish uchun 30 kun sarflagan. Avtomobilda bu masofani 28 soatda bosib o‘tishi mumkin edi.
U sayohatining boshida yo‘l belgilaridagi yozuvlarni yaxshi tushunmagan va yo‘lovchilardan yo‘lni so‘ragan. Unga ma’lumot bergan yo‘lovchilar noto‘g‘ri yo‘nalishni ko‘rsatgan. Pul yetishmasligi sababli, u internet kafelarda tunagan va kafe egalaridan ovqat so‘ragan. U yo‘lda muzlab qolmaslik uchun uzun yashil yomg‘irpo‘shda boshini bog‘lagan holda sayohatga chiqqan.
Velosipedchi bilan gaplashgan politsiya va o‘tkazish punkti xodimlari unga uyiga yetib olishi uchun poyezd chiptasi sotib olib bergan. Mashable nashrining yozishicha, Oy taqvimi bo‘yicha Yangi yilni nishonlash uchun taxminan 282 million xitoylik boshqa mamlakatlardan o‘z yurtiga qaytadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)