Britaniyalik fuqaroga bo‘yining balandligi sababli avtomobil boshqarish taqiqlandi

Sud britaniyalik fuqaroga bo‘yi boshqa haydovchilarni chalg‘itgani tufayli avtomobil boshqarishni taqiqladi, deb The Telegraph nashri xabar berdi.

Politsiya Nyukasl shahrida yashovchi 26 yoshli Adam Elliotni Ford Ka kabrioletida ketayotgan vaqtida to‘xtatdi. Shamol qaytaruvchi oynaning tepasidan chiqib turgan erkakning boshi tartibni saqlash xodimlarining e’tiborini tortgan. Ular Elliot mashinani turgan holda boshqaryapti, deb shubhalangan.

Avtomobil savdosi bilan shug‘ullanuvchi Elliotning bo‘yi 200 santimetr bo‘lib, o‘z xaridoriga olib ketayotgan mashina uning bo‘y-bastiga to‘g‘ri kelmagan.

Politsiya men rulni turgan holda boshqardi deb bayonot berdi, biroq bunday bo‘lmagan. Shunchaki, mening bo‘yim bu avtomobil uchun balandlik qildi.

Adam Elliot

Sud majlisi davomida Elliot, advokatning tavsiyasiga binoan, avtomobilni xavfli ravishda boshqarganini tan oldi.

Shunisi aniqki, siz tomi yig‘ilgan kichkina avtomobilda o‘z bo‘yingizni ko‘rsatib maqtangansiz. Bu bilan siz boshqalarni chalg‘itgansiz, bu esa xavfli.

Sud ishi bo‘yicha sudya

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.