Toshkentda ingliz va nemis tillarini o‘rgatadigan Germaniya metodikasi asosidagi futbol maktabi ochiladi

Germaniyaning Shlotaym shahriga qarashli JFL-Schlotheim maktabi bilan hamkorlikda Toshkentda futbol maktabi ochiladi. Bu haqda “Championat.asia” nashri ma’lumot berdi.

Maktab uchta yosh toifasida faoliyat olib boradi: U11 (2006), U10 (2007/08) va U9 (2009/10). Har bir guruhga 23 nafardan bola qabul qilinadi va ularning 20 nafari shartnoma asosida faoliyat olib boradi. Uch nafari esa maktab fondi asosida qabul qilinadi.

Yevropa metodikasiga ko‘ra, bu yerda bolani avvalo yetuk inson bo‘lib yetishishi uchun urg‘u beriladi. Maktab murabbiylari bahor va yoz oylarida Germaniyada malakasini oshirib qaytadi. Bu vaqtda germaniyalik murabbiylar ularning o‘rnida Toshkentda mashg‘ulot o‘tkazadi. Ularda maxsus shifokor ishtirok etib, bolaning salomatligini nazorat qiladi.

JFL-Tashkent futbol maktabi ingliz va nemis tillarini o‘rgatishi bilan farq qiladi. Unda maktab fanlari jiddiy nazorat qilinadi. Rejaga ko‘ra, maktab o‘quvchilarni 15-fevral sanasidan boshlab qabul qiladi.

Kompaniyaning Toshkentdagi filiali asoschilaridan biri Dilshod Qoriyev baza masalasi deyarli hal bo‘lgani haqida aytib, uning qayerda joylashganini sir saqlagan. Qoriyevning ishontirib aytishicha, bazadagi shart-sharoitlar ota-onalarni quvontiradi.

Yevropada farzandingizni futbol maktabiga olib borsangiz, uning futbolchi bo‘lib yetishishiga yuz foiz kafolat berilmaydi. Ammo bolangizning boshqa fanlardan qolib ketmasligi, kun kelib boshqa kasbni tanlamoqchi bo‘lsa, qiyinchiliksiz o‘sha sohada davom etishini ta’minlaydi. Chunki ular yosh futbolchiga o‘z farzandi sifatida qaraydi. Biz ham shu metodikani qo‘llashni niyat qilayapmiz.

Bizga kelgan bolakay futboldan tashqari maktabning boshqa fanlarini ham mukammal bilsin. Deylik, 16 yoshli boladan futbolchi chiqmadi. Ammo u kamida nemis va ingliz tilini biladi, rus tilida gaplashadi. Agar biz Germaniya metodikasini to‘liq o‘zlashtirib olsak, yillar o‘tib oliy ligamizda bizning maktabdan chiqadigan ko‘p futbolchilarni ko‘rishimiz mumkin bo‘ladi. Ishimiz samarasini yaqin 6 yilda ko‘ramiz.

Dilshod Qoriyev, JFL-Tashkent asoschilaridan biri