AQShning Trassalardagi harakat xavfsizligi bo‘yicha milliy boshqarmasi 2016-yil mayida Tesla Model S ishtirokida sodir bo‘lib, haydovchining o‘limini keltirib chiqargan avtohalokatni tekshirish natijalarini e’lon qildi, deb yozadi Meduza. Tergovchilar Tesla avtopiloti normal tarzda ishlagan va halokatga sabab bo‘lmagan degan xulosaga keldi.
Hisobotda aytilishicha, elektromobilning avtomatik tormozlanish tizimi, birinchi navbatda, harakat chog‘ida to‘qnashuvlar oldini olish uchun ko‘zda tutilgan. Tesla’ning qarshisiga to‘satdan tutash yo‘ldan yuk mashinasi chiqib qolganida, u vaziyatga ta’sir o‘tkazgan bo‘lishi mumkin emas.
Shu bilan birga, Tesla avtopiloti avtomobil tomonidan to‘liq boshqaruvga mo‘ljallanmagan va haydovchi tomonidan doimiy nazoratni talab qiladi. Boshqarmadagilar ta’kidlashicha, avariyadan so‘ng Tesla yana bir straxovka tizimini qo‘shdi. Endi mashina haydovchi qo‘li bilan rulni tutib turishini nazorat qiladi, agar u ogohlantirishdan keyin ham rulni tutmasa, avtopilot safar yakunlangunicha, o‘chadi.
Tekshiruv, shuningdek, Tesla mashinalarida rulni avtomatik boshqarish rejimi paydo bo‘lganidan keyin, avariyalar soni 40 foizga kamayganini ko‘rsatdi.
YTH 2016-yilning 7-may kuni, shimoliy Floridada sodir bo‘ldi. Model S avtomobili shosse bo‘ylab harakatlanayotgan vaqtida yuqori yorug‘lik tufayli yuk mashinasining tirkamasi tagiga old qismi bilan kirib ketgan. Buning oqibatida 40 yoshli Joshua Braun halok bo‘ldi. Tesla vakillarining qayd etishicha, agar avtomobil tirkamaning oldi yoki orqa qismiga urilganida, xavfsizlik vositalari haydovchining jonini saqlab qolishi mumkin edi.
Izoh (0)