O‘zbekistonda pasport-viza, xorijga chiqish va kirish tizimini takomillashtirish rejalashtirilgan, deya xabar bermoqda “Gazeta.uz” Prezidentning Mamlakatni 2017—2021-yillarda yanada rivojlantirish bo‘yicha harakatlar strategiyasi to‘g‘risidagi farmoni loyihasining muhokamasiga tayanib.
Loyiha ichki va xorijga chiqish pasportlarini berish tartibini joriy qilgan holda xorijga chiqish uchun ruxsatnoma (stiker) rasmiylashtirish tartibini bekor qilishni nazarda tutadi. Bundan tashqari, alohida asoslar bo‘yicha xorijga chiqish huquqini sud tomonidan cheklash tartibi kiritilishi kerak.
Hujjat orqali ma’lumotlarni qayta ishlash bo‘yicha zamonaviy axborot-kommunikatsiya texnologiyalarini, chegara nazorati organlariga yo‘lovchilar haqida dastlabki ma’lumotlarni taqdim etish amaliyotini, avtomatlashtirilgan pasport nazorati kabinasini, chegarani kesib o‘tayotganlarni qidiruvda bo‘lgan shaxslar fotobazasi bilan solishtirish tizimini joriy etgan holda aeroport va temir yo‘l vokzallarida pasport nazorati tizimini soddalashtirish rejalashtirilgan.
Bundan tashqari, jismoniy shaxslar uchun bojxona hududiga kirib kelish va uni tark etish bo‘yicha “yashil” va “qizil” yo‘lak tizimini amaliyotga tadbiq etish belgilangan.
Ta’kidlanishicha, mazkur choralarni amalga oshirish xorijga chiquvchi fuqarolarga qulay shart-sharoitlar yaratish, ularning huquq va erkinliklari kafolatlarini mustahkamlash, chegara nazorati organlari faoliyatini takomillashtirish va samarasini oshirish, shuningdek turizm sohasini rivojlantirishga xizmat qiladi.
Izoh (0)