Shvetsiyaning Sollefteo shahrida ikki akusher o‘ziga xos kurslar tashkil qildi. Ularda qatnashish uchun kelganlarning barchasi avtomobilda tug‘uruq qabul qilish jarayoniga o‘rgatiladi. Bu haqda The Local nashri ma’lum qildi, deb yozadi “Motor”.
Dastur doirasida kurs qatnashchilariga homilador ayol bilan uzoq safarga chiqilganda, tug‘uruq jarayoni yo‘lda boshlangan taqdirda o‘zini qanday tutish va nimalar qilish kerakligi so‘zlab beriladi.
“Agar eng yaqin tug‘uruqxonagacha qishda, qorong‘i va yomon aloqa bilan 120—200 kilometr bosib o‘tish talab etilsa, har qanday holat yuz berishi mumkin. Avtomobil buzilib qolishi yoki yo‘ldan chiqib ketish mumkin”, — deydi kurs tashkilotchisi Stina Naslund.
Sollefteo tug‘uruqxonasining yopilishi haqida ma’lum bo‘lgandan so‘ng akusherlar dasturni yo‘lga qo‘yishga qaror qildi. Endi shahar ayollarining Ernshyoldsvik yoki Sundsvall tug‘uruqxonalariga borishiga to‘g‘ri keladi. Ularning har ikkalasi Sollefteodan taxminan 100 kilometr masofada joylashgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)