Mac App Store keshini tozalab, dasturlarni yuklashdagi muammolarni hal qilamiz

Ba’zan macOS uchun dasturlar do‘koni ishida nosozliklar yuzaga keladi, natijada yangi dasturlarni yuklab olish yoki mavjudlarini yangilash amalga oshmay qoladi. “Layfxaker” nashri yozishicha, odatda bu keshdagi xatoliklar bilan bog‘liq, bunda tizim yuklab olishni to‘xtagan joyidan davom ettirishga harakat qiladi va buni bajara olmaydi. Muammoni Mac App Store’ni qo‘lda tozalash orqali hal etish mumkin.

Ishga kirishishdan avval, albatta Time Machine’ning zaxira nusxasini yaratib qo‘ying. Har ehtimolga qarshi.

Dastlab, Mac App Store’ni menyu orqali yoki Command + Q tugmalari yordamida to‘liq to‘xtating.

Bizga zarur bo‘lgan, keshdan iborat papka tizim qa’riga yashiringan. Unga “Terminal” buyrug‘i yordamida yetib borish mumkin:

open $TMPDIR../C/com.apple.appstore/

Uning ichidagi barcha elementlarni ish stoliga olib o‘tish va Mac App Store’ni qaytadan ishga tushirish kerak bo‘ladi.

Agar qayta ishga tushganidan keyin hammasi joyida bo‘lsa, com.apple.appstore papkasidagi ish stolida saqlab qo‘yilgan fayllarni o‘chirish mumkin.

Bunday hiyla dasturlarni yuklab olish va yangilashdagi xatoliklarni to‘g‘rilaydi, va Mac App Store yana yaxshi ishlay boshlaydi.