Germaniyaning “Xoffenxaym” klubi 2016/17-yilgi mavsumda mag‘lubiyatga uchramagan kuchli beshlik milliy chempionatlarining yagona jamoasi bo‘lib turibdi.
15-yanvar holatiga ko‘ra kuchli beshlikda Madridning “Real” klubi ham shunday natija qayd etib turgandi. Biroq “Qirollik klubi” La liganing so‘nggi turida “Sevilya” mehmoni bo‘ldi va 1:2 hisobida imkoniyatni boy berdi.
Germaniya Bundesligasi ishtirokchisi bo‘lgan “Xoffenxaym” chempionatda yetakchilik qilayotgani yo‘q. Klub “Bavariya”, “Leyptsig”, “Gerta” va “Ayntarxt” klublaridan keyin 5-o‘rinni egallab turibdi. Qiziq tomoni, “Xoffenxaym” chempionat davomida eng ko‘p — 10 marta durang o‘ynagan jamoa hisoblanadi.
Yulian Nagelsmann boshqaruvidagi “Xoffenxaym” 10 ta durangdan tashqari, 6 ta g‘alabani o‘z hisobiga yozib qo‘ygan. Mag‘lub etilgan klublar orasida “Shalke”, “Bayer”, “Gerta” kabi nomlar ham bor.
Qiziq tomoni, “Xoffenxaym”ga ustozlik qilayotgan Yulian Nagelsmann endigina 29 yoshga qadam qo‘ygan. Uning qo‘l ostida o‘zidan katta bo‘lgan 3 nafar futbolchi to‘p suradi. Yana ikki nafari murabbiy bilan tengdosh.
Ayni vaqtda Germaniya Bundesligasi klublari qishki ta’tilga chiqib ketgan. 21-yanvar kuni “Xoffenxaym” safarda “Augsburg” mehmoni bo‘ladi. U o‘zining mag‘lubiyatsiz seriyasini qanchagacha davom ettira olishini vaqt ko‘rsatadi.
Izoh (0)