O‘zbekiston Respublikasi Qurolli Kuchlari davlat muzeyida “O‘zbekiston Respublikasi Qurolli Kuchlariga 25 yil” esdalik nishonlarini topshirishga bag‘ishlangan tantanali marosim bo‘lib o‘tdi, deya xabar berdi O‘zA.
Unda O‘zbekiston Respublikasi Mudofaa vazirligi vakillari, harbiy xizmatchilar, oliy harbiy o‘quv yurtlari kursantlari, madaniyat va san’at namoyandalari, jurnalistlar ishtirok etdi.
Tadbirda O‘zbekiston Respublikasi Prezidenti nomidan davlat mudofaa qudratini mustahkamlash va milliy armiya shakllanishiga munosib hissa qo‘shgan bir guruh harbiy xizmatchilarga “O‘zbekiston Respublikasi Qurolli Kuchlariga 25 yil” esdalik nishoni tantanali ravishda topshirildi.
– Guruh komandiri nafaqat askarlarga rahbarlik qilishi, balki o‘rnak ham bo‘lishi lozim, – deydi serjant Sh.Egamberdiyev. – Men har kuni o‘z bilimimni yanada boyitishga vaqt ajratib, yangi texnika va uskunalar, ingliz tilini o‘rganmoqdaman. Bu oldimga qo‘yilgan vazifalarni muvaffaqiyatli hal etish va boshqalarga ham ko‘maklashish imkonini berayotir. Ushbu esdalik nishoni bilan taqdirlanganimdan faxrlanaman.
Tadbir yakunida bayram konserti namoyish etildi.
Izoh (0)